【BB來了】「貼地」金句多 黎諾懿回應老婆疑有孕︰有冇咁容易中呀?

圖︰黎諾懿主演的無綫劇集《BB來了》,啟播不足一星期已大獲好評,唔少觀眾都讚此劇夠「貼地」,對白夠真實。(網上截圖)

無綫劇集《BB來了》啟播不足一星期已大獲好評,於劇中飾演葉致廷嘅黎諾懿,得知老婆唐恬兒(李佳芯飾)意外懷孕,即刻搶走支驗孕棒大叫︰「有冇咁容易中呀?」仲要飲酒定驚,搞到一班「媽媽Group」觀眾「嬲豬」,仲話好想「剪」咗佢?呀!

究竟劇中有咩金句令觀眾咁有共鳴?即刻來個金句盤點先!

「有冇咁容易中呀?」

話說唐恬兒懷疑自己懷孕,老公葉致廷即刻話︰「你唔好自己嚇自己,你上年做婦科檢查,醫生話你個子宮向後屈,冇咁易有BB嘅!」當葉致廷得知老婆唐恬兒懷孕,即刻搶走佢支驗孕棒大叫︰「有冇咁容易中呀?」呢個情節,真係睇到媽媽們嬲到想攞架撐㗎!

圖︰當葉致廷得知老婆懷孕,即刻搶走佢支驗孕棒大叫︰「有冇咁容易中呀?」(網上截圖)

「有冇咁驚呀?」

唐恬兒見老公咁驚訝,仲要飲酒定驚,就覺得呢個男人唔想負責任啦!所以就問老公︰「有冇咁驚呀?」仲嬲到話唔要個BB?呀!需知道女人最緊要有安全感,何況有BB嘅女人係特別敏感㗎,各位男士真係要小心言行呀!

圖︰第一次做爸爸,又要負起咁大責任,當然會有啲驚。(網上截圖)

「女人由大肚開始,根本就係一隻雞乸」

劇中有一幕講到葉致廷向外父唐秋(羅樂林飾)求救,唐秋就講咗另一番「至理名言」話︰「女人由大肚開始,根本就係一隻雞乸,雞乸為咗保護雞仔,係不惜一切,義無反顧。」雖然用「雞乸」比喻女人,聽起上嚟唔夠優雅,但如果大家有玩過「麻鷹捉雞仔」,相信就會明白呢個「雞乸論」的確係好傳神咁帶出母愛嘅偉大。

「你身為老公同老竇,唔就晒佢,只會冇掟企。」

外父唐秋繼續話:「你身為老公同老竇,唔就晒佢,只會冇掟企。」聽完「雞乸論」,外父都不忘教返葉致廷一招傍吓身!而葉致廷明白咗侍產男人嘅「生存之道」,即刻為老婆安排最好,先陪唐恬兒上陪月課程,又應老婆要求搵新屋,做足準傭迎接囡囡出世!

圖︰葉致廷向外父唐秋(羅樂林飾)求救,唐秋當然要教一兩招過佢傍吓身!(網上截圖)
分享: