【我睇緊咩台?】曾志偉現身ViuTV世界盃節目

圖︰見到曾志偉現身ViuTV,視覺上真係有啲衝擊!(ViuTV截圖)

世界盃昨日(11日)晚上舉行準決賽,克羅地亞更加贏咗英格蘭,成功晉身決賽,可以同法國爭冠軍。不過,香港球迷未睇大賽之前,先目睹曾志偉首次現身ViuTV做嘉賓,同剛約滿無綫嘅主持林曉峰(阿Lo),齊齊做《Good Night Show 全民睇波派對》節目;之後仲講埋波?!

阿Lo嗌「阿爸」 志偉講「打和啦!」

志偉一出場,阿Lo即以「阿爸」稱呼佢,而志偉以明星足球隊身份現身,仲分享佢支持黑馬克羅地亞,話克羅地亞球員有經驗,仲話兩隊會打成平手,再射十二碼分勝負,重點係︰「打和啦!」因為呢句係志偉喺TVB做獎門人節目時,成日講嘅「對白」!

啱啱由俄羅斯世界盃現場,返到香港嘅志偉話,「我啱啱先落飛機,我幾難得可以同大家傾吓計、講吓波咁呀!我真係『恨』到不得了!世界盃缺少咗樣嘢,就係同我哋同觀眾分享世界盃;今日返嚟一齊講吓波呀咁,不知幾開心呀!」

ViuTV請明星足球隊睇世界盃

而志偉現身嘅呢一part節目,其他主持少不免有啲拘謹。但做現場節目經驗十足嘅志偉,都盡力同唔同主持交流;見有主持冇講過嘢,仲特登同佢傾計,仲同女主持們打成一片!好似主持潘杰寧發現志偉哥身上有英國國旗,志偉都發揮急才話︰「你見唔到我件衫咩色咩?黑住佢丫嘛。」

其實今次除咗曾志偉之外,譚詠麟、羅家英、許志安、梁漢文、孫耀威、吳國敬、劉浩龍等,都有獲ViuTV邀請到俄羅斯;據悉,ViuTV為明星足球隊隊員提供機票、住宿同埋決賽入場券,同行家屬則要自費。連馬海倫,仲有汪明荃都有跟羅家英一齊去㗎!

圖︰曾志偉一直同無綫助理總經理(非戲劇製作)余詠珊傳不和。(ViuTV截圖)
圖︰志偉出席ViuTV節目,其他主持似乎有啲拘謹。(ViuTV截圖)
分享: