【港姐2018】複選有佢哋!港版後藤久美子vs真人版大蕃薯

圖︰黎瑞恩朋友的女兒吳天兒(左)參選港姐,被讚似後藤久美子;犯罪學碩士Coco則被網民笑似曾志偉同大蕃薯。(TVB港姐官網圖片)

2018香港小姐競選今日(11日)進行複選,入圍第二輪面試嘅除咗有被讚似「日本國民美少女」後藤久美子、兼為黎瑞恩(小恩子)朋友囡囡嘅吳天兒(Tiffany);犯罪學碩士畢業、被網民笑似曾志偉同大蕃薯嘅Coco,亦都順利晉身第二輪面試。

獲黎瑞恩教路 「淡定啲、笑多啲」

Tiffany今朝於康城站接受訪問,今次被講到成為大熱,佢笑笑口話:「多謝,我對自己有信心,上帝有預備。」而問到小恩子有否向佢傳授心得?Tiffany繼續keep住笑容話︰「佢叫我淡定啲,面對記者笑多啲。」果然有跟足auntie咁做!

22歲嘅Tiffany,15歲去咗英國讀書,見佢皮膚有啲黑,Tiffany就話︰「之前去泰國做咗一年義工,主要喺山區教英文,我唔知呢啲係咪優勢,個個眼光都唔同,做自己ok。」

至於以犯罪學碩士之名入圍複選嘅Coco,對自己入到圍都有啲意外:「冇諗到可以入第二輪,我覺得自己唔係贏,只係唔小心look咗入嚟,平常心面對。」對於網民話佢似曾志偉同大蕃薯,Coco大方回應:「睇到啲留言開心,話我似曾志偉同大蕃薯,我覺得好可愛!」

分享: