【天公造美】吳香倫披嫁衣好感動 陳榮峻︰唔洗激動,你已經係我老婆!

圖︰陳榮峻與吳香倫的「黃昏戀」開花結果,並已於今日(10日)舉行婚禮。(微博圖片)

陳榮峻同吳香倫(Helen)的「黃昏戀」開花結果,並已於今日(10日)舉行婚禮。Helen披上嫁衣,由契爺棠哥陪同進入教堂,新娘子簽紙時十分感動,引唔住流下開心淚水;而老公陳榮峻安慰太太時,更大放「閃光彈」指︰「唔需要咁激動嘅,依家簽咗紙,你已經係我老婆,我已經係你老公。」

子女到場見證 陳榮峻兄任證婚人

近日天氣一直都唔太穩定,難得今日天公造美,連新娘子Helen都話︰「今日天公造美,交通好暢順,好感恩。」新娘子又話︰「我真係好感動,冇諗過可以有咁多朋友同我分享喜悅,我控制唔到喊,係咁流淚。」陳榮峻則獲全家出席婚禮,包括佢嘅一對龍鳳胎Jessica同阿聰、長子陳穎霖、兩個孫,連93歲媽咪都一齊影全家福,四代同堂見證陳榮峻嘅大日子!

陳榮峻話︰「仔女辛苦過我哋,因為要幫我哋頻樸。」Helen更指,大女Jessica為他們打點婚禮,「好似今朝我可能有啲緊張喉嚨痕,佢(Jessica)就即刻攞喉糖畀我食。」而陳榮峻嘅哥哥更加由紐西蘭飛返香港,擔任其證婚人;同時,亦有一批親友特地從英國返嚟出席婚禮。

老公話事 揀去地中海度蜜月

至於度蜜月地點,陳榮峻就話最初太太都想去馬來西亞,顧及一下當地嘅fans,但咁樣就會冇乜時間過二人世界!因此陳榮峻自己話事,揀度蜜月地點,「平日乜都係太太話事,今次由我做主,決定去地中海度蜜月。」Helen更即刻「夫唱婦隨」,大讚老公英明!

62歲嘅陳榮峻同58歲嘅Helen,將於14日凌晨出發,展開地中海度蜜月之旅,用10日享受寧靜嘅島嶼生活同靚景,專心過吓二人世界。

圖︰陳榮峻同Helen又可以一齊去旅行,享受10日地中海度蜜月之旅。(Facebook圖片)
分享: