【坤哥談姊弟戀】邀田蕊妮合唱新歌 吳業坤︰我會點到即止!

圖︰田蕊妮同吳業坤「亦師亦友」,但坤哥的「敢言」不時令阿田及大眾汗顏。(ig圖片)

田蕊妮(阿田)由吳業坤(坤哥)參加歌唱比賽入行就睇住佢發展,二人「亦師亦友」,不過「敢言」嘅坤哥就成日講錯嘢,激到阿田唔知好嬲定好笑!最近坤哥更擺埋阿田上枱,由Wyman為佢哋寫一首講「姊弟戀」嘅新歌;但坤哥日前受訪時,繼續貫徹「敢言」風格,仲話阿田符合晒「姊弟戀」嘅要求,令全場嘩然!

坤哥愛思想成熟女生 肉體唔成熟都得?

短短一個訪問,坤哥已多次爆出令人汗顏嘅言論。問到「追女王」坤哥鍾唔鍾同熟女玩「姊弟戀」?坤哥就話︰「我覺得思想成熟係好需要嘅,肉體上就可以……年齡上就要成年囉…肉體上唔成熟都得,但思想成熟、年齡合法。」原本都算兜得番嘅,點知下一句又出事!坤哥笑住話︰「阿田就符合晒呢啲要求喇!」聽到全場嘩然,問坤哥︰阿田係人妻都啱?

坤哥就話︰「幻想啫,大家留啲幻想空間!做戲咁做,但我會點到即止;佢老公(杜汶澤)呢…真係…唔好怪我喇…」其實坤哥已經唔係第一次公然「調戲」已為杜太嘅阿田,最離譜一次相信係阿田攞住「田妹妹」公仔拍女性潔膚液廣告,坤哥睇完廣告片留言︰「下次開工介紹田妹妹比(畀)我識呀」,搞到阿田即刻留言鬧爆佢!

究竟坤哥點解成日亂講嘢?佢琴日(9日)出席為DSE放榜考生打氣嘅活動時,話自己會考中文科唔合格,作文更加只得U!佢話自己應考時理解錯咗題目,後來重考呢一科,先攞得番好成績。唔知係咪因為解錯咗啲乜,令佢成日口出狂言呢?

圖︰阿田與坤哥合唱Wyman新歌《大女人主義》,阿田留言叫坤哥等收嘢!(ig圖片)
圖︰點知坤哥又大膽回應︰「我會喺下面等你架啦!」似乎又有啲語帶相關。(ig圖片)
分享: