【港姐2018】首輪面試今日展開 參選人泳衣Look搶先看!

圖︰2018香港小姐首輪面試今日展開,唔少參選人嘅泳衣Look,喺佢哋ig已經睇到!(ig圖片)

2018香港小姐競選首輪面試今日(6日)展開,當中亦搵到一啲熟悉面孔﹐例如︰參加過ViuTV《美選D.n.A》嘅湯沛宜,同埋前as one成員Nata陳苑澄;另外,今年啱啱在中大護理系畢業、聲稱未搵到工嘅陳曉華(Hera),喺ig都有放泳衣相同其他靚相。等我哋即刻睇相,嚟個比拼先!

湯沛宜(Toto)

湯沛宜(Toto)於2016年參加ViuTV選美節目《美選D.n.A》,因入到最後8強而開始出名;其實佢早於2007年開始,已有參演TVB劇集,包括︰《同事三分親》、《建築有情天》、《金石良緣》同《美麗高解像》;亦有參演過電影,如2017年嘅《我要發達》同《一家大晒》。難怪佢今日受訪時,會話唔怕因為ViuTV節目而有弱勢啦!

除咗泳衣Look,近期世界盃賽事愈戰愈熱,Toto都有穿上佢支持嘅球隊球衣,化身「足球寶貝」為愛隊打氣,仲順便騷埋fit爆身材呀!根據網上資料,Toto現時27歲,由於參選港姐嘅年齡上限係27歲,如果賽例無變,呢次將係Toto參選嘅最後機會!

圖︰除咗泳衣Look,喺Toto ig都佢著性感球衣,化身「足球寶貝」嘅fit爆靚相!(ig圖片)

陳苑澄(Tania,藝名Nata)

藝名Nata嘅陳苑澄(Tania),2012年加入組合As One而入行,但佢喺2017年2月已經退出。Nata細細個已經係體操高手,曾經係香港藝術體操隊成員,參與過唔少公開表演。

現時23歲嘅Nata於今日受訪時表示,自己休息咗一年,因為好鍾意唱歌、跳舞,所以突然產生咗一個念頭嚟選美。睇睇Nata嘅ig,亦有唔少靚相分享,仲連行山都不忘性感。

圖︰睇睇Nata嘅ig,亦有唔少靚相分享,仲連行山都不忘性感。(ig圖片)

陳曉華(Hera)

今年港姐亦有大學畢業生參加,23歲嘅Hera陳曉華,今年先啱啱於中大護理系畢業,而在ig亦搵到佢嘅畢業袍相。而Hera身高173cm,喺ig都搵到佢嘅長腿泳衣Look;有model身材﹐學歷又高,實力強勁呀!

雖然Hara受訪時話自己啱啱畢業,仲未搵到工,所以想趁呢一年試下參選港姐;但睇ig亦見到Hara都有接吓model job,影靚相、sell下美容、化妝產品。

圖︰喺Hera ig都搵到佢嘅長腿泳衣Look;有model身材﹐又係中大護理系畢業,實力認真強勁。(ig圖片)

其他參與初選嘅佳麗仲包括︰上年參加過港姐但落敗嘅范莎莎(21歲)、黃夏蕙契女Eva林昕雨(24歲)、潛水教練Honey Ho(23歲)等等。睇嚟今屆港姐,都不乏高質靚女參選!

分享: