【深宮計大結局】太平公主自縊 胡定欣竟然唔洗死?

圖︰《深宮計》今晚大結局,究竟劇中角色嘅結局如何?邊個要死,邊個可以留低?(網上截圖)

無綫重頭劇《宮心計2深宮計》今晚終於大結局!劇集總監製梅小青話︰「呢套劇係善劇,善心有善報。」咁究竟劇中角色嘅結局,又係咪真係貫徹呢個宗旨呢?

李隆基登位 王皇后打入冷宮

馬浚偉飾演嘅李隆基終於登上皇位,仲打算信守對任三恕(馬國明飾)嘅諾言,將王皇后(胡定欣飾)治罪;點知王皇后亮出一條刀疤,原來佢當年曾經為李隆基擋過一刀,最後李隆基冇廢除皇后,仲立佢為「唯一的皇后」;王皇后避過一死,但就永遠打入冷宮,呢個結局可謂比死更難受。而李隆基雖然得皇位,卻失去愛人同友人。

至於同王皇后鬥咗好多集嘅太平公主,嫁禍李隆基不成,因自知死路一條,寧願用白綾自縊死於宮中;而章尚宮(謝雪心飾)為咗害死兩個皇后而補過,自此就留喺廟中。

南宮司設尋成內侍 大派「洋蔥」

南宮司設(康華飾)、陸司製(張慧儀飾)同徐司珍(羅霖飾)恩准出宮,南宮司設當然第一時間去搵成內侍(韋家雄)。可惜成內侍原來已經一早病死,而南宮司設一直收到嘅家書,其實係成內侍臨終前寫好,再托朋友定時寄出嘅,可謂結局嘅一大「洋蔥」位。至於陸司製同徐司珍就去咗開店做首飾,仲會同「結局彩蛋」麥玲玲爭生意。

至於痛失摰愛嘅任三恕,就申請出宮歸隱;而「假死」嘅何離(蕭正楠飾),就得李成器(李天翔飾)幫助,成功隱瞞身份出宮,仲可以同元玥(劉心悠飾)有個Happy Ending!

圖︰何離成功隱瞞身份出宮,可以同元玥有個Happy Ending。(影片截圖)
分享: