【深宮囍事多】秘密入紙 26歲何艷娟嫁66歲澳博營運總裁

圖︰於《深宮計》演女史、2014年港姐季軍何艷娟,與澳博營運總裁吳志誠秘婚,「爺孫戀」開花結果。(ig圖片)

現年26歲、2014年港姐季軍何艷娟(Katherine),最近於無綫重頭劇《宮心計2深宮計》飾演羅霖的司珍房女史;雖然娛樂圈發展平平,但成日喺ig展示琴技的Katherine,於感情路上開花結果,更搵到個好歸宿!Katherine昨日(4日)被爆入紙申請結婚,未來老公係現年66歲、身家豐厚的澳博營運總裁吳志誠。

同住半山 不時孖住去聚會

有傳Katherine當年因專心選港姐,而影響學業,最終只能獲香港大學法律系三級榮譽畢業,加上娛樂圈事業發展得唔太順,苦等4年先喺《愛·回家》有個叫得出名嘅角色,估唔到佢「守得雲開」,會因選港姐而嫁入豪門。

根據資料,與Katherine入紙結婚的吳志誠,婚姻狀況為鰥夫;二人報地址時,都寫埋同一個半山地址,相信已經住埋一段日子。據悉,Katherine於當選後曾被安排出席博彩公司活動,因而邂逅吳志誠,二人低調相戀3年多,更會不時孖住出席朋友聚會。

演員接連傳婚訊 梅小青︰善心有善報

Katherine同吳志誠共譜「爺孫戀」,連羅霖同《深宮計》總監製梅小青都好開心!羅霖得知Katherine婚訊就話︰「恭喜晒,個個都嫁得咁好。」而梅小青則認為,《深宮計》係善劇,因此「善心有善報,幾位演員都得到幸福」。

其實除咗Katherine,《深宮計》入面嘅演員都接連傳出婚訊,包括︰於劇中飾演太平公主近身宮女嘅李美慧,同埋飾演公公嘅韋家雄!

劇中飾演太平公主近身宮女嘅李美慧,上月嫁57歲富商曾文豪,現已陀B近6個月。(Instagram圖)
分享: