【深宮計】周秀娜演技大爆發 髮簪喪插太醫學徒

圖︰周秀娜飾演的鄭純熙,終於拆穿王皇后嘅陰謀!(網上截圖)

無綫重頭劇《宮心計2深宮計》終於進入結局階段,周秀娜(娜姐)飾演嘅鄭純熙,終於拆穿王皇后(胡定欣飾)嘅陰謀!昨晚(4日)播出嘅第33集入面,純熙無意中聽到太醫學徒(林子超飾)喺後宮唱戲,仲親眼睇住佢叫「有刺客」,終於知道叫「有刺客」嘅宮女,其實係太醫學徒扮嘅!

純熙拆穿王皇后陰謀

純熙於是叫太醫學徒去佢寢宮重演呢幕,當學徒意識到自己嘅身份畀純熙識穿後,就打算逃走。純熙即時拎起髮簪喪插太醫學徒;學徒面對嚴刑逼供,終於講出「火燒藏書閣」、「石擊甘若芊」、「金鵲害滑胎」嘅種種連環毒計,而「幕後黑手」就係王皇后。

怒火中燒嘅純熙即刻帶埋太醫學徒去搵王皇后對質,仲力數王皇后惡行,大爆一句︰「你簡直係人面獸心!」娜姐演技大爆發,表情、聲線嘅演繹都好震撼!不過奇就奇在,王皇后竟然可以反指純熙歪曲事實,太醫學徒仲臨時「掉轉槍頭」,誣陷純熙要脅佢,搞到純熙大叫冤枉。

純熙唯有搵好姐妹「玲瓏公主」(劉心悠飾)盡訴心中情,「玲瓏公主」話︰「真壞人唔可怕,最可怕嘅係假好人。」而純熙就再爆出一句:「要佢(王皇后)罪有應得,根本就係空想!我就要以其人之道還治其人之身!」

圖︰「玲瓏公主」見純熙咁火滾,就勸佢唔好步王皇后後塵。(網上截圖)
分享: