【芭樂歌?】鄧小巧新MV血紅色調 大談失戀治療

圖︰鄧小巧身穿紅衣現身MV,呢個場景係片中最少紅色嘅一場。(YouTube截圖)

「芭樂」係台灣水果名,而「芭樂歌」則是台灣人對民謠、民歌(Ballad)嘅稱呼;不過近年已演變成帶點負面嘅歌曲形容詞,泛指嗰啲情情愛愛、重重覆覆嘅流行曲。今次黃偉文(Wyman)為鄧小巧填詞嘅新歌以《芭樂》為歌名,小巧話,希望成為一首「失戀治療曲」。

失戀會唱K 搵首歌代表自己

今日(27日)小巧到商台宣傳歌曲,佢就解釋︰「好多人失戀都會想搵首歌代表自己,又或者去唱K;我自己都試過失戀,(嗰時)最鍾意唱孫燕姿、張惠妹同王菲(嘅歌),感覺啲歌好代表到(自己心情),今次呢首歌嘅目的都係一樣!」

鄧小巧今年初宣佈於社交平台上「閉關」,佢仲話,「閉關」後多咗時間見朋友同聽歌、睇書,覺得生活更加充實。今次為宣傳新歌重返社交平台,小巧話︰「有好多贊助要多謝同埋(有好多)MV相要Post,自己都盡量控制唔好花太多時間。」

圖︰「閉關」多月嘅小巧重返社交平台,宣傳MV同新歌。(ig截圖)

MV首播 小巧網上回歌迷留言

新歌MV日前(25日)亦於YouTube首播,MV更非常大膽,配合歌詞以血紅色為主調,小巧更上演「最後晚餐」、「灑溪錢」同「淋紅油」,有歌迷彈歌曲「太芭樂」,亦有人留言讚好︰「芭樂歌沒有錯~如果一首芭樂歌可以讓你更多人欣賞你,更多人聽你唱的歌,我希望這首歌可以像「女神」一樣成功。讓WYMAN將妳提升到另一個LEVEL!加油!」

小巧亦有回覆歌迷留言,例如有人留言︰「小巧聲底唱呢d歌真係爆露弱點,最後想唱得爆d但把聲放盡都係唱得好吃力」,小巧就回覆指︰「下次跟你學唱歌」,對方應該冇諗過歌手回覆,即刻話︰「對唔住呀我有話直說,小巧唔好嬲嬲豬,詞曲都好正咖」。

圖︰《芭樂》MV以血紅色為主調。(YouTube截圖)
圖︰小巧仲要扮名畫「最後晚餐」中嘅耶穌!(YouTube截圖)
圖︰MV尾段,小巧經一場「淋紅油」大戰後,變成咁樣。(YouTube截圖)
分享: