【金秘書為何那樣】朴敘俊為朴敏英擋雨 場面浪漫

圖︰人氣韓劇《金秘書為何那樣》今晚播第7集,朴敘俊用外套為朴敏英遮雨,場面浪漫。(網上圖片)

tvN人氣韓劇《金秘書為何那樣》,今晚(27日晚)播出第7集。從劇組公開嘅劇照可見,男主角朴敘俊同女主角朴敏英正式拍拖;呢個時候,當然唔少得……一場突如期來嘅大雨啦!男方更加除低外套,為女方遮雨;有網民話,場面似足經典電影《假如愛有天意》。

為朴敏英參加公司同事活動

《金秘書》一劇在韓國熱播,帶動劇中提及嘅書籍銷量大增。而隨住劇情發展,朴敘俊同朴敏英終於正式拍拖,一向「勁mean」(苛刻)、飾演大公司副會長嘅朴敘俊,更加會為朴敏英參與同事活動,二人更會遇上一場大雨!

劇照中,朴敘俊同朴敏英去咗避雨,之後朴敏英唔知發生咩事、一臉恐慌,朴敘俊即時體貼搭住佢膊頭送上安慰。另一圖片就係朴敘俊除下外套為朴敏英遮雨;對比返《假如愛有天意》嘅劇照,場面又真係幾似模似樣!單睇劇照都已經咁吸引,相信今集有機會令《金秘書》嘅收視再創高峰!

圖︰朴敏英唔知發生咩事、一臉恐慌,朴敘俊即時體貼搭住佢膊頭送上安慰。(網上圖片)
圖︰朴敘俊同朴敏英去避雨。(網上圖片)
圖︰網民覺得遮雨場面似曾相識,似足經典電影《假如愛有天意》嘅場面。(網上截圖)
分享: