【2億台幣vs港幣】蕭敬騰置3萬呎真豪宅 陳奕迅買3千呎獨立屋

圖︰記者話蕭敬騰的台北豪宅價錢為約1億台幣,令Eason超驚訝!(網上截圖)

台灣第29屆金曲獎為陳奕迅(Eason)帶來兩個驚喜大獎,但有一件事,令見慣大場面嘅Eason超驚訝!

話說首次為金曲獎擔任主持嘅蕭敬騰,公開其3.5萬呎豪宅畀大會拍訪問,屋入面有展覽廳、畫廊,仲有私人庭院、籃球場同泳池。Eason忍唔住問記者︰「他(蕭敬騰)是不是很有錢?」點知,記者回應大宅價錢約為1億台幣(約2,600萬港幣),嚇到Eason眼都突埋!

1億台幣?在香港只能買小套房吧!

其實Eason對於豪宅樓價又點會唔熟悉?佢幾年前先斥資2.31億港元,購入實用面積3,238平方呎嘅壽臣山SHOUSON PEAK獨立屋,畀老婆徐濠縈做結婚8週年禮物。據悉,Eason仲要月供70萬還「樓債」,認真吃力!

至於蕭敬騰嘅台北「真‧豪宅」,面積3.5萬呎,私人空間十足,真正嘅樓價其實係2億台幣(約5,248萬港元),但都比Eason買嘅獨立屋價錢低逾4倍。連Eason都話,「2000多萬港幣」呢個價錢,喺香港「只能買小套房吧」!

講返蕭敬騰嘅豪宅,呢個六星級屋苑只有27戶,背靠17公頃嘅山林,加上保安森嚴,連台灣天后張惠妹都係住喺呢度!

圖︰上方為Eason購入的壽臣山SHOUSON PEAK豪宅;下方則為蕭敬騰位於台北市南港區的六星級豪宅。(官網圖片)
圖︰蕭敬騰家有紅色三角琴,琴鍵仲係紅黑色的,夠晒特別!(影片截圖)
圖︰蕭敬騰家有畫廊。(影片截圖)
圖︰外面有山林園景。(影片截圖)
分享: