【大叔的愛】「春田田」田中圭樂聚天倫 食飯飲酒B不離手

圖︰「春田田」田中圭2011年與日本女星Sakura奉子成婚,二人育有兩個囡囡。(ig圖片)

於日本BL神劇《大叔的愛》飾演「春田田」嘅男主角田中圭,人氣急升,連佢嘅私生活都成為焦點。其實田中圭早於2011年8月同日本女星SAKURA(原名杉安廣美)奉子成婚,更加係兩個囡囡嘅爸爸。日前,田中圭就被影到佢同家人樂聚天倫,又餃子又歎紅酒,而同行嘅二囡都好黐爸爸,田中圭因此繼續B不離手!

東京餃子店食飯 替外父夾餸斟酒

據日本傳媒報道,田中圭於本月一下午由屋企搭的士趕去東京一間餃子店,太太SAKURA、二囡同外父已經到咗,原來係約好一齊食午餐!

田中圭一方面照顧住二囡,另一方面亦有為外父夾餸、斟酒,等太太可以專心享受午飯時間,「慢食」兩個半鐘之後,更轉場到另一間餐廳歎紅酒,田中圭繼續B不離手,畀囡囡坐大髀。

33歲嘅田中圭又孝順又愛家,加埋事業上發展順利,確實令人羡慕!

圖︰《大叔的愛》令劇中主角人氣急升,劇集官方書籍嘅預售仲衝破3萬本!(網上圖片)
分享: