【深宮計】周秀娜試藥浴浸出禍 純熙三恕遭審問

圖︰周秀娜於《深宮計》中有出浴場面。(網上圖片)

無綫劇集《宮心計2深宮計》,除咗王皇后(胡定欣飾)同太平公主(陳煒飾)愈鬧愈熱,周秀娜(娜姐)飾演嘅鄭純熙登場,亦令此劇「可觀性」大增!第27集,更有娜姐露出香肩、長腿出浴嘅劇情;不過純熙卻因為試「紫蘭湯」藥浴,搞到同任三恕(馬國明飾)被審問!

衝入湯浴追查刺客 被懷疑暗結私情

話說純熙夜晚去「紫蘭湯」藥浴,諗住調理身體,點知浸浴期間驚現刺客!正於附近巡邏嘅任三恕當然即刻衝入「紫蘭湯」追查,卻被路過嘅皇后同淑太妃(韓馬利飾),見到純熙同三恕共處一室,懷疑二人暗結私情,搞到佢哋要被審問。

二人面對審問,又冇證據證明自己清白,何離(蕭正楠飾)就挺身而出,話會搵到叫「有刺客」嘅宮女,又通知李隆基回宮救人!李隆基趕到後,被太平公主阻攔佢將此案延後審理,仲想快快將三恕同純熙治罪。

此時,元玥(劉心悠飾)帶住上咗手扣嘅宮女若芊(黃心穎飾)出現,話佢就係叫「有刺客」嘅人!唔知元玥同何離,係咪真係可以還三恕同純熙一個清白?

圖︰元玥帶住上咗手扣嘅若芊出現,話佢就係叫「有刺客」嘅人!(網上圖片)
分享: