【勁歌熱舞】阿姐開騷唱足3個鐘 家英哥由綵排陪到上台

圖︰汪明荃星期六(23日)於澳門開演唱會,以3個鐘勁歌熱舞回饋歌迷。(fb圖片)

汪明荃(阿姐)星期六(23日)晚於澳門舉行「50週年 The Timeless Concert 2018」演唱會,70歲的阿姐更以連場勁歌熱舞回饋歌迷,又唱又跳3個鐘!而老公羅家英(家英哥)則由綵排陪住阿姐,陪到佢上台,更於台上大談阿姐威水史,阿姐當然甜到漏啦!

事隔34年 將重踏中山紀念堂舞台

星期六晚的演唱會獲好友森森、斑斑兩姊妹,以及97年港姐冠軍翁嘉穗及老公鄔友正專程「過大海」捧場。而家英哥即使第二日要搭機,亦都陪住阿姐,又上台大讚佢,難怪阿姐都話︰「佢真係好唔話得,今晚做完自己嗰部份就趕住走,因為要一早飛去銀川,嚟緊廣州站佢又係咁趕,所以我好感謝佢!」

阿姐入行超過50年,雖然仲有2個多月就71歲生日,但依然又唱又跳,3個鐘內唱足30首歌,仲換咗8個造型!演唱會分為多個環節,包括︰懷舊國語金曲、經典電視劇金曲、電影歌曲、粵劇、勁歌熱舞等;而今個星期六(30日),阿姐更加會重回1984年曾站台表演過嘅廣州中山紀念堂開show!

阿姐表示,她曾於1984年為中山紀念堂「詩與歌朗誦晚會」擔任壓軸表演嘉賓,因此成為當年少數被邀請到內地表演嘅香港藝人,佢仲話:「相隔34年,今次汪明荃以個人演唱會(形式)喺咁有歷使價值嘅場館舉行(演出),我真係好開心!」

圖︰好友森森、斑斑亦有「過大海」支持阿姐,老公家英哥更加由綵排到上台都陪住阿姐。(fb圖片)
分享: