【唔再做公主?】紫昕姐姐最新音樂劇 首次演古裝扮花木蘭

圖︰紫昕姐姐終於有新突破,今次唔公主,首次參演古裝劇,擔演花木蘭一角。(網上圖片)

人稱紫昕姐姐嘅李紫昕(Purple),自2012年起涉足劇場,先後於多部音樂劇飾演公主角色,更因而成為網上熱話!今年暑假,紫昕姐姐終於擺脫公主造型,首次演出古裝劇,做花木蘭一角。

故事正面 望為小朋友打氣

紫昕姐姐介紹新劇時表示︰「呢個係富有正面訊息嘅故事,我哋希望透過呢個演出為香港人,特別係小朋友打氣。我聽過好多家長分享,知道仔女成長嘅需要,因此希望透過我嘅音樂同故事,引導小朋友正面嘅人生觀,學習克服困難同難關,以勇氣去迎接人生每個挑戰同考驗。」

據悉,今次紫昕姐姐要女扮男裝、又要大耍武術,不過佢本身有粵劇北派底子,相信唔難做到。而佢更加獲得迪士尼垂青,推出由佢聲演嘅迪士尼花木蘭故事書,書入面仲會加插佢嘅花木蘭造型。另有飲品公司為今次音樂劇製作「木蘭花茶」,邀請紫昕姐姐做代言人。

扮公主曾惹負評 被網民指「P圖」過度

2016年暑假,紫昕姐姐參演音樂劇《睡公主與月亮王國之謎》,被網民批評「43歲仲學人扮公主」及宣傳海報「P圖過度」。紫昕姐姐曾被指要印傭瞓廁所而惹負評,有網民仲話佢即使做公主都係「黑心公主」。

對於被網民批評,李紫昕受訪時表示「會以樂觀態度面對一切」:「始終大家審美眼光各有不同,(我)會接受意見亦會做好自己,其實我覺得每一個年齡都可以做公主。」佢又話,自己因角色需要先會著上公主戲服,亦唔係自己主動要求做呢個角色,又唔覺得自己嘅海報「P圖過度」。

圖︰紫昕姐姐曾於多部音樂劇中飾演公主。(網上圖片)
圖︰紫昕姐姐於2016年參演《睡公主與月亮王國之謎》一劇,宣傳海報被網民笑指「P圖過度」。(網上圖片)
分享: