【單身十年】康華專心拍劇搵錢 為患病父母付百萬醫療費

圖︰康華為父母推掉兩部內地劇,並花近100萬俾爸媽做心臟同眼科手術。(網上圖片)

於無綫劇集《宮心計2深宮計》飾演南宮司設嘅康華,入行24年,先後有過兩個男朋友,可惜因為演過唔少情婦角色,令兩段感情都得唔到男方家人認同。2007年,康華決定去內地發展,佢單身10年,專心拍劇搵錢,仲成為有車有樓嘅圈中「小富婆」!

46歲嘅康華近年見父母身體轉差,就推咗兩部新劇、放棄7位數字酬勞回港照顧兩老。仲花費近100萬積蓄,畀父母做心臟同眼科手術,的確係難得嘅好女仔同孝順女!

「錢係冇咗,但我覺得好幸福」

康華曾經擁有3層過千萬嘅荃灣物業;而面對父母患病、醫療開支日重,康華就默默付出︰「以前有錢咪帶父母睇私家醫生囉,依家冇咯,咪轉睇公立囉。公立醫院嘅醫療設備都好完善,最大分別係探病時間嚴謹咗;好彩醫生都體諒我,有時都會通容一下,又會耐心講解(病情)我聽!」

原來康華試過因拍劇,未能及時出現照顧病危父母,「有幾次要我趕返嚟先救得番父母,佢哋有心臟病,工人都照顧唔嚟!」康華於是推咗兩套劇,返香港照顧兩老。對於為父母花上百萬醫療費,康華就話︰「雖然錢係冇咗,但我多咗時間睇佢哋,我覺得好幸福!」日前康華忙完工作,仲專程去觀塘街市買藥材、排骨煲湯,再去醫院探病。

無懼冇人追 靜候「真命天子」

單身咗10年,會否擔心自己嘅感情事?康華就好坦然咁話︰「好多人都以為女明星多人追,其實我真係冇人追……但唔緊要啦,『真命天子』未出現!」

呢位孝順女仲話︰「我就用呢段時間好好珍惜同父母嘅相處,都係一件好幸福嘅事嚟!」

圖︰46歲嘅康華雖然單身10年,但亦冇為自己嘅感情事而擔心。(網上圖片)
分享: