【生完都咁瘦】何嘉莉做KOL 靚媽親授極速修身法

圖︰何嘉莉生完兩個小朋友都咁瘦,仲同飛機師老公Gerald Sze一家四口生活美滿!(ig圖片)

37歲何嘉莉(Lilian),日前演身張敬軒演唱會,唔少人都讚佢皮膚好!何嘉莉2006年先嫁甜品大王黃逸璋,誕下大仔Jean,惟於2014年宣布與黃逸璋結束9年婚姻;至2015年11月,何嘉莉再低調同飛機師Gerald Sze結婚,去年9月更誕下囡囡Zoe!生完一對仔囡都又瘦又靚,究竟Lilian有咩極速修身法?

生完進補 調節飲食

睇返舊相,何嘉莉早在懷孕時已Keep到手腳纖幼;加上生完有進補,增強體質再減肥,當然事半功倍啦!Lilian話︰「生完之後我用咗兩、三個月進補,嗰段時間肥咗好多;補完之後先開始on diet,但冇話跟營養師餐單,只係好簡單咁就減到肥!」

原來Lilian調節咗食飯時間同食物種類,「夜晚六點就食晚飯,唔食澱粉質,當晚就盡量都唔好再食嘢,其實你只要試一日,第二朝起身都會發覺個肚腩細咗,之後就會愈來愈瘦。」至於早午餐,Lilian都食得幾豐富,可以食澱粉質類食物,所以佢覺得,「呢種減肥方法係好輕鬆又有效!」

圖︰何嘉莉懷孕時已Keep到手腳纖幼。(ig圖片)
圖︰現為KOL嘅何嘉莉,仲同囡囡Zoe一齊拍片,教一眾媽媽做產後運動修身!(ig圖片)
分享: