【深宮計】太平公主惡鬥王皇后 勾心鬥角致慘痛下場!

圖︰太平公主於劇中大鬥王皇后,但最終下場慘痛!(網上圖片)

無綫重頭劇《宮心計2深宮計》,太平公主(陳煒飾)同王皇后(胡定欣飾)勾心鬥角、愈鬥愈烈!太平公主成日揶揄王皇后「冇仔生」,仲四出搵靚女服侍唐玄宗(馬浚偉飾);而太平公主雖然有7名子女,但因為自己起兵奪權,令子女逐一喪命;最後連佢最愛錫的親生仔,都唔肯救自己一命!

太平公主7名子女 最後死淨2個

王皇后一直「膝下無子」,太平公主藉此原因向佢發動「攻擊」,仲用「美人計」希望令王皇后於後宮失勢!而歷史上,太平公主有兩任丈夫,佢同第一任丈夫薛紹育有2子2女、同第二任丈夫武攸暨再生下2子1女,個個都聰明絕頂。

其中,太平公主最愛鍚與第二任丈夫所生的次子薛崇簡,不過因為政治理念不同,二人經常出現分歧,太平公主更成日毒打薛崇簡,令兒子心生怨恨。最終太平公主因起兵奪權,令3子1女牽連斷命,只得薛崇簡與其同母異父妹妹武靈覺可保住性命。

圖︰太平公主最終都鬥唔過唐玄宗。(網上圖片)

薛崇簡心硬 不肯救母

太平公主「造反」,當然難逃一死;佢最後被侄子唐玄宗賜死於家中,結束50年人生。原本唐玄宗同薛崇簡兄弟情深,又係好朋友,太平公主都諗過叫薛崇簡向皇上求情;可惜薛崇簡對太平公主怨恨太深,唔肯代母求情,結果眼白白讓母親被賜死。

但由於薛崇簡始終係太平公主之子,唐玄宗賜佢姓李後,就送佢出宮,先去蒲州(浙江),後貶到溪州(湖南),最後於袁州(江西)病逝。妹妹武靈覺則被送到景福寺出家,法號威儀,至52歲去世。

太平公主於宮中勾心鬥角,更鬥到想謀朝篡位﹐最終自招慘痛下場!

圖︰太平公主於宮中勾心鬥角,更鬥到想謀朝篡位﹐最終自招慘痛下場。(網上圖片)
分享: