【認追楊柳青】唐文龍鍾情年輕靚女 曾力追佘詩曼、羅子喬

圖︰48歲唐文龍感情一直冇著落,最近有周刊影到佢同楊柳青食飯,仲無否認追緊女方!(ig圖片)

已經48歲、仍未結婚嘅唐文龍,近日被周刊影到同有樣有身材嘅楊柳青「撐枱腳」,二人世界逾一個鐘!30歲嘅楊柳青笑得燦爛、唐文龍則細心體貼,走嗰時仲傍住著斗零踭嘅楊柳青,猶如「護花使者」。

被問及同楊柳青喺感情上係咪有得發展?唐文龍無否認追緊楊柳青,只係話︰「發唔發展呢啲係後話,而家先做好當前工作,但同佢相處幾愉快嘅,所以聯繫吓感情先啦。」而唐文龍一向鍾情年輕靚女,曾力追佘詩曼、羅子喬等靚女,而楊柳青亦似乎合晒唐文龍要求!

17年拍《溏心3》認識 將一同拍詠春特輯

唐文龍同楊柳青早喺2017年拍《溏心風暴3》而認識,最近唐文龍嘅詠春師傅諗住拍一個「詠春十二手」嘅特輯,要搵一個「有動作基礎、又靚、身形又好嘅女演員去完成呢件事」,唐文龍就搵咗楊柳青合作喇!唐文龍仲話因為拍攝詠春嘅關係,二人仲可以透過黐手嘅攻防去聯繫一下喎!

楊柳青又後生又靚女,當然不乏追求者!佢6月初就喺ig上載「收花相」,並留言︰「Thank you, it’s beautiful.」似乎楊柳青對於送花人好受落咁喎,但就無講咁大束玫瑰花係邊個送嘅。

唐文龍多年未婚 常傳緋聞

唐文龍過去曾多次傳出緋聞,初入行時,唐文龍曾與陳少霞拍拖,不過幾年後分手。至2000年,唐文龍與佘詩曼於《十月初五的月光》一劇合作,被指力追佘詩曼。2003年,唐文龍被拍到同當年嘅新人關心妍手拖手行街,惟事後女方否認戀情。

他曾在訪問表示,當年向拍拖7年嘅圈外空姐女友提出分手,係為咗唔想拖累當方。之後唐文龍去北京發展,有詠春底嘅佢,又被指力追羅子喬。2017年底,唐文龍憑《溏心風暴》人氣勁升,被傳與家有十億身家嘅中大學生黄文意拍拖,都係無下文。

由於唐文龍感情多年無著落,搞到被傳與同性好友劉永健搞「斷背情」,唐文龍強調同對方只係好兄弟,仲擔心呢單同性緋聞令佢搵唔到女朋友呀!

圖︰唐文龍去北京發展,有詠春底嘅佢,被指力追學生羅子喬。(ig圖片)
分享: