【地震好得意?】傅嘉莉失言被轟 刪片換黑白相道歉

圖︰傅嘉莉於ig直擊地震情況,見地震新聞畫面在震,覺得「好得意」、「好搞笑」,被網民狂轟,要急刪影片及道歉。(ig圖片)

日本關西地區日前發生6.1級地震,最少3人死亡,逾300人受傷。傅嘉莉與阮小儀、金剛及衛志豪正於大阪附近嘅姬路拍攝TVB節目《街坊廚神》,小儀好快於網上報平安,仲話有啲恐怖;點知傅嘉莉喺ig直擊情況時,竟然用「好得意」、「好搞笑」形容地震新聞畫面,被網民狂轟,要即刻刪片改Po黑白相道歉。

網民怒斥無同情心

傅嘉莉在ig story上載多段影片,當拍到正在播放的地震新聞時,電視機在搖晃,傅嘉莉竟然話﹕「好得意呀,啲新聞,個畫面喺度震㗎,好搞笑,我哋頭先應該係feel到……」唔少網民怒斥傅嘉莉無同情心,又話佢「30幾歲人(講嘢)唔用腦」。

傅嘉莉︰「係我唔識表達」

見到網民嘅怒火留言,傅嘉莉急急刪片,仲改Po黑白相,於留言寫道︰「對唔住!引嚟咁大的誤會,係我唔識表達,唔夠智慧,無危機意識。之後再睇新聞知道有傷亡,先意識到這是一場很嚴重的天災… 天佑大阪」。

而有粉絲亦出面為傅嘉莉「還擊」︰「講緊個畫面啫 洗唔洗話人無咩 痴咩呀」、「一兩句說話就說她沒同理心?」、「已表示歉意已足夠,無心之失言,你要窮追猛打何必呀!咁你又代表甚麼來力踏她呢!你也是凡人!」

《街坊廚神》監製黃中濠在接受傳媒訪問時表示,看到地震報道後亦有致電導演了解佢哋喺日本嘅情況,因導演話只係感受到微震,所以節目會如常拍攝。

圖︰《街坊廚神》導演話只感受到微震,所以節目會如常拍攝。(ig圖片)
圖︰傅嘉莉「失言」後快速道歉,獲Fans力撐。(ig圖片)
分享: