陳靜貼一年前索爆舊照 網民戲言:你想殺人咩?

圖:陳靜要為新戲減肥,佢話要睇番啲舊相,勉勵自己。(IG圖片)

陳靜(DaDa)自從喺2013年憑《低俗喜劇》嘅「爆炸糖」一角攞咗金像獎最佳女配角,近年都專注電影方面發展。雖然冇再出噴血寫真,但DaDa間中都會喺社交平台派福利。

想警愓自己

噚日DaDa突然喺ig上載咗一張泳衣,只有半身,見唔到頭,不過身材就真係睇到人「嘩嘩」聲。DaDa一個側身,23吋纖腰,盡現玲瓏浮凸身材。有網民噴血留言﹕「你想殺人咩?」不過原來呢張只係一年前嘅舊照,佢話﹕「大家都以為係新相,其實我係想警愓自己,可以操番咁fit。」佢透露最近成日周遊列國去旅行,嚟緊8月就會正式開新戲,減肥同增戲都係為咗工作,佢話﹕「嚟緊會拍兩部戲,原本有一部要增肥,但時間有啲調動,要拍咗唔使增肥嗰部先,所以依家又要減番肥,拍完一部先再增肥。」

圖:DaDa一貼出泳照,網民紛紛留言大讚。(IG圖片)
分享: