【深宮計】戲裡戲外努力養家 張文慈︰孭兩層樓「周身債」

圖︰張文慈於戲裡戲外一樣努力為家人,戲中為兄「死慳死抵」,戲外買樓畀細佬住。(影片截圖)

於《宮心計2深宮計》飾演「尚宮房四司」之一嘅「汪司膳」張文慈,即將演技大爆發!佢喺劉心悠嘅幫助下有機會出宮還鄉,本應打算同初戀情人結婚、與阿哥阿嫂共聚天倫樂;點知未離宮,阿哥阿嫂突然入宮,話佢哋變賣晒所有家當,諗住「遠走他方」;張文慈最後仲要爆喊鬧佢哋,上演一場同至親斷絕關係嘅「死心戲」!

入行超過20年嘅張文慈,喺戲內為阿哥「死慳死抵」,原來現實生活中,佢都為家人無私付出。為咗買樓畀細佬住,張文慈加按居屋,孭起兩層樓同「周身債」,只為讓細佬同爸爸生活無憂。

為家人揸舊車 「捱得好辛苦」

唔好睇張文慈有兩個物業喺手,出入又揸Benz「好富貴」,其實真係有苦自己知。張文慈日前接受周刊訪問,直言其居屋只有兩間房,因擔心細佬結婚有埋小朋友會唔夠住,就將居屋向銀行加按,為細佬購入何文田區豪宅。

張文慈話︰「其實都唔係好夠錢,買樓係畀細佬住,當係幫補細佬,有個地方住。」她又指︰「我而家捱得好辛苦,要供樓、養阿爸,孭到周身債;架Benz都揸咗接近十年,係舊車!」

演技好 大陸網民激讚

對於今次喺《深宮計》嘅演出獲大陸網民激讚,張文慈話:「我睇呢場劇本時已經好鍾意,其實唔只嗰場戲,成集戲我都好鍾意!有內心戲,又要同屋企人嘈交,我覺得係一個好故仔、好機會。」

不過,好故仔都要靠演員努力先會好睇,張文慈指,「今次三日內要拍晒三日戲,逼埋一齊,對白有七頁紙,得我一個人solo鬧阿哥阿嫂!演之前都擔心自己做唔到一氣呵成,好彩出到嚟效果好!」

圖︰張文慈係孝順女,工作再忙,父親節都有同爸爸一齊飲茶慶祝。(ig圖片)
圖︰張文慈成日要舟車勞頓北上拍戲「搵銀」,習慣帶齊「三寶護身」。(ig圖片)
分享: