【童星長大了】細時可愛大時顏值高? 原島大地20歲演《某日某月》

圖︰原島大地(左)轉眼20歲,以高顏值參演《某年某日》,除咗佢之外,呢啲童星大個咗都一樣靚仔、靚女!(網上截圖)
單看上圖童星,你又認得幾多個?最近上映、由劉偉恒執導嘅電影《某月某日》,童星出身、已經20歲嘅原島大地擔任男主角,估唔到細時可愛嘅佢,大個咗顏值依然咁高!
除咗原島大地,童星出生嘅佢哋,大個咗都一樣靚仔、靚女㗎!

張國權

圖︰張國權(網上截圖)

張國權細細個就參演劇集《我和殭屍有個約會》,飾演「復生」呢個《殭屍》三部曲入面嘅重要角色,睇過呢套劇嘅觀眾,或者會記得呢句經典對白︰「大佬佑,你再唔嚟救我,我就要改名叫人死不能複生啦!」

長大後嘅張國權有如「日系型男」,4年前已經結婚做人夫,仲成日喺網上社交平台放閃。細時可愛、大時靚仔嘅張國權,仲係演員尹天照同萬綺雯嘅契仔!

黃美棋

圖︰黃美棋(網上截圖)

黃美棋6歲就入行參演電影《香江花月夜》,而佢喺賀歲片《行運一條龍》飾演「小芬女」,大大聲鬧吳孟達,令觀眾留下深刻印象。現年28歲嘅黃美棋﹐曾經做過《蜜桃成熟時1997》,後來到美國升學,畢業後重返娛樂圈,更被網民封為「美棋BB」!

徐嬌

圖︰徐嬌(網上截圖)

2006年俾「星爺」周星馳選中參演《長江七號》嘅徐嬌,以男仔頭造型成為片中女主角。深得星爺歡心嘅徐嬌,以「星女郎」姿態進軍娛樂圈,大個女更憑標緻外貌,成為內地新一代花旦!

唐寧

圖︰唐寧(ig圖片)

8歲入行嘅唐寧,可謂香港嘅經典童星!9歲參演吳宇森電影《縱橫四海》,飾演童年版鍾楚紅;喺《大時代》飾演童年版方芳;1993年更於《白髮魔女轉》中「女扮男裝」,飾演少年版張國榮!去到少女時代,唐寧就參演青春電影《4個32A和一個香蕉少年》。現年37歲嘅唐寧,去年宣佈與舞台劇才子鄧偉傑離婚,雖然要獨力撫養1仔1女,但美貌依然!

原島大地

圖︰原島大地(網上截圖)

原島大地係中日混血兒,2003年在電影《忘不了》中,飾演張柏芝養子梁嘉樂,以一句「我會乖㗎嘞,唔好唔要我!」,令不少觀眾流淚。張栢芝憑此戲獲得金像獎影后殊榮,原島大地嘅演技亦因而備受關注。原島大地於千禧年繼續參演多套電影、劇集;在剛上映嘅電影《某月某日》中,更擔正做男主角,顏值之高,絕對可以令佢成為新一代男神!

分享:
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟