【7年冇見】宣萱參演內地劇《聽雪樓》 終於拍古裝造型超冷艷!

圖︰宣萱事隔7年再拍古裝,做「冷艷」反派。(網上圖片)
宣萱自從參演去年播出嘅《不懂撒嬌的女人》之後,又有一段時間冇拍電視劇喇 !最近,內地劇《聽雪樓》劇照曝光,大家終於再見到宣萱嘅身影,而且仲係久違7年嘅全新古裝劇造型呀!

網民︰太美、太帥、太霸氣

對於宣萱嘅古裝新Look,網民大讚「太美、太帥、太霸氣」!而喺《聽雪樓》入面,宣萱會飾演名為華蓮嘅反派;雖然對外公佈嘅暫時只有一張硬照,但宣萱一個側身加上銳利眼神,已經霸氣十足!唔少網民都非常期待佢嘅演出。

講起宣萱拍古裝片,以下都係經典例子,包括︰《尋秦記》、《烽火奇遇結良緣》、《施公奇案II》等。當中,《尋秦記》烏廷芳同鳳菲嘅扮相,脾氣倔強又嬌俏可人;《烽火奇遇結良緣》做樊梨花,演勇敢聰明嘅女將;《施公奇案II》演吳君柔五奶奶一角,敢愛敢恨、外柔內剛,真係每個古裝造型同角色,都令人留下深刻印象!而佢對上一部拍嘅古裝片,已經係2011年播出嘅《萬鳳之王》。

雖然宣萱喺《聽雪樓》一劇只係做客串演員,但事隔7年可以再睇到佢演古裝,絕對值得期待!
圖︰一睇就知係《尋秦記》嘅烏廷芳。(網上圖片)
分享: