【想回到過去】黃子華閉關想瘦身 「當年嘅余樂天先係正常!」

圖︰黃子華話,希望自己可以變返當年《男親女愛》嘅余樂天咁樣。(網上圖片)

即將於7月舉行「封咪」棟篤笑嘅「子華神」黃子華,近日正閉關為演出努力「度橋」。不過,子華對於自己嘅身形似乎有啲唔滿意;仲話《男親女愛》入面嘅余樂天,先係佢心目中最Perfect嘅模樣!

子華日前出席電影《中英街1號》首映禮,佢接受訪問時笑言,自己最近真係飽滿咗︰「我其實係想瘦啲,但控制唔到我個胃,我一向都好為食,而家希望可以變返當年嘅余樂天;當年嘅余樂天先係正常,頭髮(髮型)都一樣!」

題材敏感 所以18禁?

至於棟篤笑嘅題材,子華就話,佢嘅棟篤笑題材次次都好敏感,包括意識上,所以今次演出,18歲以下人士係唔准入場㗎!子華仲話,「度橋」都度得好辛苦!

對於有報道話佢賺夠1億「收山」,子華就再次重申,佢只係「收咪」而唔係「收山」!仲話演出之後導演趙崇基或者會搵佢拍戲㗎!

圖︰當年黃子華飾演嘅余樂天,又真係串得嚟幾charm嘅。(影片截圖)
分享: