【又傳婚變】王浩信、陳自瑤過唔到七年? 傳Yoyo提離婚、已分居!

圖︰王浩信、陳自瑤再傳婚變,傳Yoyo已單方面提出離婚,二人已經分居。(網上圖片)

王浩信同Yoyo陳自瑤自2011年結婚後﹐屢次傳出婚變。今日(1日)更有傳媒報道指,Yoyo已向王浩信提出離婚,二人亦早已分居!

其實王浩信婚後多次傳出緋聞,繼而引發佢同Yoyo嘅婚變傳聞;不過Yoyo每次都為王浩信出面澄清,估唔到今日會傳出婚變加分居消息。不過從王浩信早前買樓,以及Yoyo近年貼出嘅ig「正能量」帖文,都唔難發現佢哋已經愈走愈遠!相信佢哋繼續維持夫妻關係,主要原因都係為咗囡囡王靖喬。

寄情工作 緋聞無間斷

王浩信近年獲TVB力捧,今年初於《萬千星輝頒獎典禮2017》首次獲封「視帝」,令佢事業更上一層樓!王浩信寄情工作,專注發展自己嘅演藝事業,網上已經好少見到佢分享同太太Yoyo嘅合照。早前王浩信公開話會買獨立屋畀老婆,但最終只帶媽媽去睇樓,最後購入位於清水灣嘅3,000幾萬豪宅單位;買樓咁大件事,Yoyo都失蹤,都真係幾唔尋常!

而且王浩信緋聞不斷,婚後更同黃心穎、蔡思貝、江嘉敏等8、90後女星傳出緋聞;Yoyo忍足咁多年,仲要次次出面「護夫」,都真係算勁喇!

圖︰王浩信近年獲TVB力棒﹐今年初更首次獲封「視帝」!(fb圖片)

遊杜拜影靚相 ig貼圖自我鼓勵

至於Yoyo,近年喺ig增設「yoyo正能量分享」系列,不時PO文、PO相自我鼓勵。上星期仲話︰「一次重要的抉擇勝過千百次的努力!今天的生活是由三、五年前選擇決定的,而三、五年後的生活是由今天決定的!祝大家週末愉快!」似乎已決心過好未來嘅生活!

Yoyo 5月初去杜拜公幹,自己遊杜拜、影靚相,睇落都幾輕鬆自在!兩日前更貼文話︰「圓規為什麼可以畫圓?因為腳在走,心不變。你為什麼不能圓夢?因為心不定,腳不動。奇蹟,還有個名字叫努力!」唔知心變嗰個係邊個呢?

圖︰Yoyo去杜拜公幹,上載多張靚相,但塊面睇落瘦咗,亦有啲攰。(ig圖片)

雖然王浩信同Yoyo對婚變一事都矢口否認,但種種跡象,都似乎力證佢哋嘅婚姻「亮起紅燈」!Yoyo喺ig仲有以下貼文︰「最大的放生是放過自己,嘗試改變自己不要再傷害自己…… 其實真正能讓我們哭笑的不是別人,而是自己,若你的喜怒都來自他人,那麼你就是個無能的傀儡。」即係話,留低或離開都需要勇氣,但最緊要係識得愛錫自己!

圖︰Yoyo不時上載正能量帖文為自己打氣,上年1月就寫道︰「我們最痛苦的,不是失去了深愛及珍貴的人與物,而是在靈魂深處少了一處寧靜的空間,讓自己在浮躁中遺棄了那些寶貴的精神。」(ig圖片)
圖︰至於王浩信今日嘅ig帖文就話,我們都是擁有更大身軀的孩子,多年的改變、不同的路向、更大的傷疤,卻有同樣的愛在裡面。(ig圖片)
圖︰王浩信3月曾經上載與囡囡靖喬嘅合照,並留言寫上Timeless(永恆)。(ig圖片)
分享: