【深宮計】曾偉權35年前係亞視一哥 冇入無綫訓練班因為……

圖︰曾偉權演駙馬演技出眾,暗暗為太平公主頂罪嘅內心戲十分催淚!(網上截圖)

喺《宮心計2深宮計》入面飾演駙馬嘅曾偉權,細膩演出再次成為觀眾焦點!早喺35年前已經喺亞視擔正做「一哥」嘅曾偉權,當初原來係想入無綫訓練班㗎!曾偉權曾經喺受訪時坦言,自己中學畢業後由澳門返到香港,一向係校內風頭躉嘅佢,就同朋友一齊湊熱鬧報考藝員訓練班,佢仲話本身想入無綫訓練班,亞視只係次選!

見多太人排隊所以轉投亞視?

曾偉權喺1982年參加亞視首屆藝員訓練班入行,佢曾經喺訪問憶述佢報訓練班嘅經過。話說當年亞視同無綫嘅藝員訓練班喺同期招生,兩個電視台嘅總部,都仲係位於九龍塘廣播道。

「去到九龍塘,我見到無綫條隊好長,但亞視就冇咁多人!」曾偉權話,佢本身嘅策略係先去亞視報完名、再去報無綫;點知排完亞視,出到嚟已經5點幾,而無綫6點就會收工,「見(無綫)外面仲有百幾人排隊,所以最後就決定返屋企!」當年同曾偉權一齊參加首屆亞視藝員訓練班嘅,仲有「展昭」何家勁㗎!

曾偉權畢業後獲亞視力捧,有份參演多套劇集,仲「上位」擔正,做《鐵膽英雄》、《小生也瘋狂》、《雲海玉弓緣》、《白髮魔女傳》等劇集嘅男主角!同佢合作過嘅女演員,仲包括「性感女神」葉玉卿!

圖︰曾偉權真係幾襯古裝㗎!(網上圖片)

轉投無綫 只能做二三線

喺亞視發展得唔錯嘅曾偉權,想轉換吓工作環境就轉投大台;點知入到無綫做過吓男主角之後,就俾新入行嘅小生「後浪推前浪」,只能穩守二、三線角色。

講到呢度,曾偉權只能感嘆講句︰「有啲人唔識演戲,但有觀眾緣,咁就已經搵到食!」面對殘酷現實,佢就有啲激動咁話︰「你可以點呀?打佢?咬佢?呢個世界冇公平!」都係嘅,即係好似無綫劇集《創世紀》嘅許文彪名句,面對殘酷現實,咪只能捉住羅家良大叫︰「呢個世界公平咩?呢個世界公平咩!!」咁囉!

圖︰轉投無綫之後,曾偉權只能做二、三線奸角。(網上圖片)
圖︰曾偉權喺《宮心計2深宮計》入面做忠角,都算係有多啲發揮。(網上圖片)
分享:
【#有禮送】下載 @ 流動新聞 📱手機APP!玩遊戲
💌送你《祟光》現金券
💌送你《鴻福堂》現金券
💌送你《百佳》現金券
🍺送你德國手工啤
👉👉一玩即知中咩獎!🤟