【母子關係OK】白韻琹自爆生過仔 兒子45歲長居美國

圖︰73歲嘅白姐姐白韻琹,與謝偉俊結婚之前有過一段婚姻,兒子現已45歲、長居美國。(fb圖片)

談起白韻琹,最令人印象最深刻嘅﹐應該係佢同老公謝偉俊從未咀嘴、亦冇性生活!不過原來白姐姐白韻琹,同謝偉俊結婚之前,曾有過一段婚姻。白姐姐前夫Andrew係緬甸首富,結婚時仲請來陳寶珠做伴娘;更令人意外嘅係,原來白姐姐有生過仔,兒子已經45歲、長居美國!

有供書教學 不時赴美探望

73歲嘅白姐姐接受周刊專訪時表示,兒子現時定居於美國洛杉磯,只係一個普通人,所以唔想破壞佢嘅平靜生活。一向敢言嘅白姐姐話︰「Out of sight, out of mind。唔睇見就唔好諗。」而謝偉俊就喺訪問中透露,白姐姐嘅仔仔曾經入讀牛津,以及法國、比利時等地嘅著名學府,現於美國政府軍部效力,仍然單身,同埋鍾意貓。

雖然同兒子分隔兩地﹐但白姐姐一直都有喺經濟上支持佢,同埋供書教學;佢又不時到美國探望仔仔。白姐姐形容,佢同仔仔之間嘅關係都「OK啦」!至於講到自己將來嘅財產分配,白姐姐冇正面回答,只用一句︰「佢(兒子)點會攞我啲嘢?」輕輕帶過。

前夫家族顯赫 白姐姐曾收八卡古董鑽戒

白姐姐嘅前老爺係「香港機械工程大王」鄺榮輝,當時做空姐嘅白姐姐喺機艙認識鄺榮輝,鄺榮輝就介紹自己嘅次子Andrew俾白姐姐!

鄺榮輝仲好錫白姐姐,有報道話佢送過一隻八卡古董鑽戒俾白韻琹!據悉,呢隻古董鑽戒係其中一位美國總統第一夫人戴過,呢位總統夫人既高貴又勤力,鄺榮輝覺得襯晒白姐姐,就買嚟送俾佢喇!只可惜呢段豪門婚姻,最終都未能天長地久。而白韻琹同謝偉俊嘅關係,就由1989年一直維持至今。

圖︰73歲嘅白韻琹同59歲謝偉俊,常常以恩愛姿態亮相。(fb圖片)
圖︰雖然傳出二人冇性生活,但白韻琹、謝偉俊嘅關係由1989年開始維持至今。(fb圖片)
分享: