【未分手?】Wyman生日會大合照 祖兒師兄身貼身

圖︰細心睇睇Wyman生日會大合照,祖兒同師兄係身貼身影相嘅!(ig圖片)

Wyman黃偉文49歲生日搞「珠片之夜」,出席嘅歌手、藝人都著住「閃爆」珠片衫現身!不過,最閃嘅一幕,竟然發生喺被熱傳分咗手嘅容祖兒同劉浩龍(師兄)身上!

睇睇Wyman喺ig嘅生日會大合照同留言先,佢話︰「七七四十九歲!珠片之夜!多謝大家!」而大合照入面,除咗有Wyman醫生密友吳偉民(Stephen)、吳君如陳可辛夫婦、鄧萃雯、鄭欣宜、王菀之、薛凱琪、鄒凱光之外,容祖兒同劉浩龍都有同場出席!留意返王菀之右膊上角,同祖兒「身貼身」影相嗰個其實係師兄劉浩龍呀!

祖兒口窒窒 企圖扯開話題 

對於早前有傳祖兒同拍拖5年嘅師兄分手,而家又突然行到咁埋,係咪已經好返冇事呢?祖兒聽到呢個問題即刻口窒窒回應:「咩咩咩冇事?(傳聞話你哋分手吖嘛…)哎呀,唔好講我啦,唔好講咁耐之前嘅嘢啦。講阿嬌咪得囉…」

事實上,自從傳出祖兒同師兄分手之後,佢哋兩個都冇正面回應過分手傳聞。至於祖兒係咪單身?佢諗咗一諗就話:「都OK啦,開心啦!」即係點呢?既然係Wyman生日,就搵一首佢填俾祖兒嘅歌詞應吓景先︰「命裡早註定/問到偏故弄玄虛」?

圖︰祖兒同Wyman都好Bling-bling呀!(ig圖片)
圖︰Wyman生日有Fiona薛凱琪獻吻。(ig圖片)
分享: