【袁偉豪睇戲外傳】「行內人」同場鬧爆商台DJ阿檸

袁偉豪、商台DJ阿檸分別與同場「行內人」起爭執﹝網絡圖片﹞

袁偉豪日前與一眾圈內人獲邀睇電影《復仇者聯盟3:無限之戰》嘅特別場,卻因為一包粟米片,與一個擔任宣傳嘅行內人掀起咗一輪口水風波,雙方亦喺社交平台擺出事件唔同版本。袁偉豪已表示唔想與對方口舌之爭,本以為事件告一段落,誰知26日,商台DJ阿檸喺fb亦有討論呢件事,不過佢話粟米片呢單嘢唔關佢事,佢同行內人反而發生咗另一件事, 阿檸喺文章中話明白俾人窒係幾咁唔好受,事緣佢當晚挨住座位椅背睇戲,到劇情肉緊位會烏前睇,咁啱就會遮到少少螢幕,阿檸話:「我諗5cm到啦,喺我正後方嘅哩位非二打六嘅師兄都即刻叫我坐底。」

阿檸話,明白在座嘅觀眾都係趕去睇首映,為咗和睦相處,結果選擇咗hea睇,hea住坐去睇戲:「無謂搞到不歡而散,於是我全晚都坐得勁Hea咁,務求後面位矮眼仔可以睇曬全螢幕。點知出字幕嘅時候佢好嬲,話人睥佢又剩,我以為佢講我頭先望佢嗰下,哦,原來唔係,個心當堂安樂曬!」

商台DJ阿檸 ﹝Facebook圖﹞

袁偉豪喺微博發文講述事件經過時,也透露:「直至電影最後出字幕的一刻,這位nachos先生旁邊的朋友就向我連聲說道:『咁x巴閉包場睇戲呀嗎!未聽過人講話睇戲不准進食!什麼大明星!咁X巴閉,點解要攞免費飛睇呀?』等等……」袁偉豪亦有喺阿檸個FB留言,佢話:「我也目睹!」

袁偉豪睇電影遭一班行內人炮轟態度差﹝網絡圖片﹞
袁偉豪﹝微博圖﹞

文末,阿檸語氣幾寸咁勸行內人話:「即係原來都係咁啫,真係純粹因為你真係nobody,網上公審人就點講都得,大明星問你少少嘢又講曬唔好意思又剩都係一種冒犯,套戲都未完場大家等緊彩蛋嘅時候,你係咁喺度話識人老鼠,又好騷擾咁大大聲問候人又點計?就因為你真係nobody就唔使負責任囉。」

分享: