拍攝處男廣告 薛世恒稱相親節目得着大:令我放膽去追女仔

由商界轉戰娛樂圈的薛世恒(Daniel),繼早前首次出演內地相親真人騷節目《愛的時差》後,近日再獻出人生第一次,為美容護膚中心拍攝「處男」廣告。在拍攝廣告當日,Daniel換多套禮服,並應導演要求連環Chok樣兼即場跳舞,他笑說:「第一次拍廣告好享受過程,因為導演要我表達『暖男』嘅感覺,代入咗感覺後,發現原來自己都有呢一面,同埋好多要Chok表情,估唔到自己都Chok 到喎。」

薛世恒拍攝處男廣告

 

事前做足準備功夫

不過始終首次拍大型廣告,事前難免會緊張,Daniel坦言為今次廣告做足準備:「前一晚有少少瞓唔着,過去幾星期都會不斷做Gym同跑步,減磅練返線條出嚟,另外都有刻意去練習望鏡頭嘅眼神同埋講嘢嘅節奏。」

薛世恒為今次廣告做足準備功夫

出演《愛的時差》後放膽追女仔

其中有一幕導演安排一位女模特兒與Daniel親密接觸,艷福不淺的Daniel攬實伊人的纖腰外,更來一個「愛的抱抱」,然而該女模反而表現有點緊張,Daniel反過來安慰之餘還令對方放鬆心情,Daniel表示:「佢可能習慣影硬照,唔慣拍廣告,我有同佢講試吓感覺我哋係一對情侶,投入返個感情。我都有諗如果呢個係我女朋友,所以會輕輕摸吓佢。」而他還坦言接拍《愛的時差》後令他放下自我,更放膽追女仔,但他表示節目結束後要收拾心情:「因為現實世界唔可以咁輕易投放咁多感情去鍾意一個女仔,可能隨時會受傷。」

薛世恒今次拍廣告有美女相伴
薛世恒表示拍攝《愛的時差》後令佢放膽追女仔

派曲奇慰勞工作人員

此外,陳敏之得知Daniel拍廣告也特意送上自家曲奇為好友打氣,更在心意卡寫上「第一次!加油!」,非常窩心。而Daniel更即場分甘同味,派發敏之的愛心曲奇慰勞現場一班工作人員。

薛世恒獲陳敏之送自家曲奇打氣
分享: