公司多方面投資 李霖恩望旗下藝人個個有工開

藝人李霖恩早前進軍幕後,成立經理人及製作公司,日前他帶同公司旗下藝人杜大偉、湯沛宜及賴嘉瑩,於土瓜灣一間小學出席童軍第120旅的就職儀式,他們更即場獲頒委任狀成為委員,將會參與各項慈善工作。

李霖恩獲頒委任狀

對於成為委員,李霖恩直言非常意外:「發夢都估唔到會做到童軍其中一個區嘅委員,童軍係好正義嘅事,我又唔似一個正義嘅人。」他指向來都有參與慈善工作,亦安排公司旗下藝人參與其中。

阿女鍾意揸飛機

活動當日眾人還參觀童軍為小孩而設的「航空訓練中心」,更落場試揸飛機,直言非常過癮!見到李霖恩對飛行系統及設備頗有興趣,他笑言自己去學駕駛飛機已經「超齡」,反而女兒對這方面感興趣:「女兒之前學咗一個由退休飛機師搞嘅課程,佢都鍾意玩,呢位退休飛機師都出咗一位十幾歲嘅女徒弟,喺澳洲成功考到飛機師牌,如果個女有興趣,都唔抗拒畀佢考。」

李霖恩親自體驗模擬駕駛飛機

公司多方面發展

雖然李霖恩現時進軍幕後,但他直言會繼續幕前工作,並透露下月將拍攝無綫劇集。至於自己公司,他則透露成立後已有連串投資計劃, 除了之前已投資的演唱會外,4月也會開拍電影和電視劇,亦計劃搞網上平台,製作不同的節目:「公司投資呢啲項目,最主要係希望畀唔同藝人都可以有工開,得到唔同工作機會,咁就皆大歡喜。」不過他坦言做老闆甚艱難:「簽咗藝人都想佢哋有工開,要顧及佢哋嘅心理狀況,所以多咗好多嘢要處理,好彩公司上下團結一心。」

左起:賴嘉瑩、李霖恩、杜大偉、湯沛宜
分享: