【被指欠租】已簽新租約 連詩雅公開業主澄清片段闢謠

歌手連詩雅(Shiga)近日可謂禍不單行,先有報道指她欠租做「租霸」,今日(4號)又有報道指於九龍塘港鐵站出現疑似有關其母的街招,並指她涉非法集資及非法轉移財產。

母親被貼街招屬惡作劇

面對一切負面新聞,今日Shiga接受無綫《娛樂新聞台》訪問澄清事件,對於母親被貼街招一事,她坦言平時甚少就這些報道回應,但今次涉及較嚴重的事情以及關於家人,故有必要回應,她表示:「以我了解,佢工作上嘅夥伴同佢有啲誤會而弄出嚟嘅惡作劇,媽咪亦將會交畀警方處理呢件事。」她指自己不太清楚母親平時工作上的情況,但無論母親做什麼事都會百分百支持:「畢竟我媽咪都係個70歲嘅婆婆,希望大家可以高抬貴手畀啲空間,畀啲時間佢解決公司嘅問題。」同時她認為母親非圈中人,故希望大家高抬貴手,並澄清母親被貼街招一事與拖欠租金沒有關係。

連詩雅接受無綫娛樂新聞台訪問,為近日連串傳聞澄清(無綫娛樂新聞台訪問截圖)

強調沒有拖欠租金

至於欠租一事,Shiga則強調沒有拖欠租金:「自己有唔啱嘅地方、處理得不當嘅地方係上一個租約完咗之後,我就一路都未簽一個新租約,但我同業主一直Keep住友好關係,亦好信任大家,我係每個月都準時交租,咁我一直都有搬嘅意願,但因為工作真係忙,要搵屋就真係唔係一件簡單嘅事情,亦都需要一啲時間,所以一路冇去處理租約問題。」她透露因有不少傳媒報道的關係,故此最近與業主簽了新租約,並指業主亦擔心自己:「佢都有問我有冇咩可以澄清返件事,喺大家同意之下亦都拍咗片,澄清返沒有任何欠款。」

業主錄音澄清

說畢後Shiga展示了業主的錄音,對方在片中表示:「我喺呢度澄清一下,最近啲消息話Shiga有拖欠,我就係呢度嘅業主,拖欠租金其實無其事,一路以嚟近呢三年,Shiga除非出外,唔係(嘅話)佢哋交租都好準期。至於話冇合約,我承認呢個單位係冇簽到合約,喺合約滿咗之後,因為大家信任大家好朋友,但因為今次事件,我哋今次上嚟,補簽返合約,所以拖欠租金呢件事係謠傳嚟嘅!」

連詩雅公開業主錄音片段(無綫娛樂新聞台訪問截圖)

租約由自己公司簽署

同時Shiga亦展示與業主所簽的臨時Agreement,證實自己沒有拖欠租金,希望藉此證明沒有這件事。之後問到她是否有財政問題?她表示自己財政及生活都沒有問題,至於講到今次事件由自稱業主好友的陳先生爆料引起,Shiga則表示不認識對方,另外有指她租住上址時由他人代為簽約,她則拿出一張由她名下公司簽署的印花稅證明文件,並表示:「其實呢間屋由頭到尾都係我自己名下公司去租嘅,而租約亦有列明係我自己本人嘅公司去租嘅,由始至終都係。對於其他人嘅說法,我都唔會再講啲乜嘢,總之呢個就係一個事實。」而新租約亦是她名下的公司簽署,故此完全沒有涉及第三者:「我好想話畀身邊嘅人聽,我真係好努力工作,希望大家唔需要太擔心。真係好對唔住令大家擔心,我平時好少去回應呢啲事情,但知道今次呢件事涉及咗好多人,尤其是涉及咗屋企人,所以我必須喺呢度解釋返畀大家聽,亦好抱歉令朋友、屋企人、粉絲擔心,我想話畀大家聽係唔需要擔心嘅,我2018年會繼續努力我自己嘅工作。」

連詩雅同業主簽咗份臨時Agreement,證明自己冇欠租(無綫娛樂新聞台訪問截圖)
分享: