【叱咤】首奪我最喜愛男歌手 陳柏宇發長文感謝:我成為世界上最開心嘅人

歌手陳柏宇(Jason)於昨晚(1號)舉行的《2017年度叱咤樂壇流行榜頒獎典禮》中首奪「叱咤樂壇我最喜愛男歌手」獎,Jason上台後難掩開心激動之情,一直強忍淚水發表感言,最後更忍不住哭了起來,他表示:「我好開心,其實呢一刻我戥同事開心,戥粉絲開心,戥每一個喜歡陳柏宇嘅人開心,如果呢一個係我最後一次攞我最喜愛男歌手嘅獎嘅話,我唔會覺得可惜,因為已經足夠。我唔怕失敗,點解?因為點樣失敗都好,永遠都有你哋喺我背後……支持我,我老婆每一年都同我講,佢哋唔識貨唔緊要,你喺我心目中已經我最喜愛男歌手!」

為了能令更多人開心

頒獎禮結束後,Jason則在社交網發長文,直言於2018年1月1日成為世界上最開心的人,他留言說:「原因係我真正感受到為人哋而開心嘅樂趣,因為我真正了解到我做歌手嘅原因,係為咗可以令到更多人開心。方法唔係唱歌俾你地聽,而係用做歌手作為一個途徑去認識更加多人,張(將)我嘅諗法向一個一個人咁宣揚開去,目的係要令到大家都可以同我一樣咁開心,一樣咁感受到唔係凡事都要為自己出發先可以得到快樂。」

同時Jason表示:「如果我為自己而開心,機會係,只有我自己開心。但如果我為人地(哋)而開心,咁起碼已經有兩個人開心(一個我,一個人地(哋))。條數點樣計落,都係後者着數啲。再睇遠啲,如果每個人都係為人地而開心,就有可能全世界都開心。我知道一定會有人睇到呢到已經覺得我扮嘢,『呢個世界,邊有咁嘅人吖。』但我可以話你知,咁係因為你唔願意去相信,呢個世界會有唔自私嘅人。又或者好不幸地,你未遇上過一個咁嘅人。係有架(㗎)!我唔係第一個,因為我能夠有呢個諗法,都係我身邊嘅人教我嘅。我唔係最後一個,因為我相信,每個人,終有一日,都可以做得到。我相信你地(哋)!」

陳柏宇晒獎(Instagram圖片)
陳柏宇Instagram留言
分享: