【Do姐再Shopping】 點解可以轉數咁快?農夫靠「食字」承包所有笑點

由鄭裕玲(Do姐)率領的旅遊節目《Do姐再Shopping》前晚(27號)首播,她首先帶住農夫及黃翠如於日本東京遊玩,有農夫這對搞笑能手就知道節目肯定勁多爆笑位,而昨晚(28號)播出的一集中亦不負眾望,完全展現出農夫兩人超乎常人的轉數,特別在食字方面!

農夫轉數極快

首先眾人去到一間可以自製筆記簿的店舖,他們當然要落力親自設計獨特的筆記簿,而在介紹他人的作品時,他們不時以奚落他人為目標,好似講到陸永的筆記簿時,C君就爆了一句:「佢本簿最啱寫一樣嘢,捨棄呀!」及後一行人就走去自己製作墨水,當黃翠如表示要整一款不像藍色的藍色時,C君可以立即找到位抽水說:「嗰隻藍係咪嗰隻蕭正楠?」引得Do姐都忍不住笑到扎扎跳,仲興奮到與C君擊掌讚好!

黃翠如講句嘢都畀C君抽水(影片截圖)
Do姐笑到扎扎跳(影片截圖)

我「呸」變我「Pay」

其後Do姐帶了眾人去賣備長炭的店舖,備長炭有吸細菌以及紅外線的作用,並可以放到水中、用來煮飯或用來裝飾,甚至有一些用炭製作的頸鏈,當黃翠如介紹一條540萬日圓的頸鏈後,C君則在其後表示:「如果我買得起嗰條頸鏈,我就唔係備長炭,我係準備長『歎』啦!」睇完備長炭,Do姐還帶他們欣賞價錢媲美日本房車的金箔筷子,一對更價值7萬港元,欣賞過後C君好自然般向Do姐講多謝,一副要Do姐送給他的感覺,當然Do姐不會理會並回答他:「痴咗線呀你?我呸!」誰知一句「我呸」都畀到位陸永入,他隨即說:「佢Pay(呸)呀!P-A-Y!」搞到Do姐都直呼「好煩呀!」一班網民都大讚他們的化學反應,並指Do姐玩得,令農夫可以放心抽水不怕得罪Do姐,網民還直言農夫的轉數實在太快,有他們兩人不怕沒有笑點!

C君笑指買得起條頸鏈就唔係「備長炭」係準備長「歎」(影片截圖)
陸永將Do姐句「我呸」變咗做「我Pay」,成個意思唔同晒(影片截圖)
分享: