「彩蛋」累事?《踩過界》大結局變「膠」?

無綫於上星期搞搞新意思,將兩套熱播嘅劇集《同盟》、《踩過界》擺喺同一星期大結局。先播出大結局嘅《同盟》最後被網民狠批「爛尾」,對於唔少情節都沒有詳細交代,結局有種草草了事的感嘅,網民甚至直指《同盟》係「年度膠劇」!

Never突然翻生

明明起初聲勢不俗嘅《同盟》最後落得如斯田地,那麼雖然喺收視上輸蝕,但贏盡口碑嘅《踩過界》又如何?今次《踩過界》係無綫同大陸愛奇藝合作,所以大陸一早已經可以睇晒成個結局,不過監製曾透露過香港版本會有唔同,有唔少人都即管睇吓有咩唔同!本身劇情講到李佳芯飾演嘅Never畀單立文推咗落海失蹤,期後王浩信飾演嘅盲俠仲收到電話去認屍,而屍體嘅DNA同Never嘅DNA係吻合,不過盲俠認屍嗰陣就表示條屍唔係Never。

盲俠喺認屍時話條屍唔係Never(影片截圖)
盲俠喺認屍時話條屍唔係Never(影片截圖)

至於喺「彩蛋」中,講到盲俠、癲姐同GOGO傾緊偈嘅時候,Never突然喺佢哋面前出現,雖然Never一句嘢都冇講,但四人好有默契咁一字排開繼續行,而監製所講香港版唔同嘅部分可能正是Never冇死到!不過奇怪嘅地方出現喇,明明當初盲俠認嘅嗰條屍無論DNA同衣着都同Never一樣,點解最後佢會突然翻生?係佢根本冇死過,定其餘三人集體撞鬼?若果Never從來冇死過嘅話,認屍嗰部分點解釋?有網民會留意到認屍嗰陣條屍頭髮係全黑,加上盲俠講過條屍唔係Never,可能就係佢未死嘅伏筆!不過以無綫劇集曾經有咁多「穿崩位」嚟講,頭髮顏色唔同亦有可能係符合返無綫一貫嘅製作水平。

Never喺「彩蛋」中出現(影片截圖)
Never喺「彩蛋」中出現(影片截圖)
最後Never冇死?(影片截圖)
最後Never冇死?(影片截圖)

「彩蛋」多餘?

《踩過界》最尾整個咁嘅「彩蛋」,可能係為續集鋪路,又或者Never嘅死令唔少網民覺得遺憾,為咗安撫觀眾嘅心而夾硬整個大團圓結局,而可能係伏筆嘅地方亦有商榷的空間。其實撇除「彩蛋」嘅部分,《踩過界》嘅結局未算如《同盟》一樣爛尾,而演員嘅演技亦非常出色,獲網民力讚,加上不完美的結局所帶出的遺憾感亦有唔錯嘅效果。然而「彩蛋」嘅部分有種為加而加嘅感覺,同時沒有加以解釋,反而搞到個結局變到講唔通,毀咗劇集本身嘅高質!

分享: