入行以來最辛苦 楊秀惠38度高溫拍外景中暑頭暈

藝人楊秀惠上個月與張衞健、蔡思貝、曹永廉、徐榮及譚凱琪等演員,為拍攝無綫重頭劇《大帥哥》外景前往佛山西樵山國藝影城逗留逾40天!由於當地每日溫度高達攝氏38度,加上秀惠每朝凌晨4點便要化妝,6點到場地開工,更拍足12小時,她都坦言今次是入行以來最辛苦的一次:「當地天氣實在太熱,戲服又厚又唔通風,每次拍攝出汗之後,啲衫就會黐住個身,由朝早6點黐到傍晚6點,係咁出汗,真係好唔舒服。」

楊秀惠話啲戲服又厚又唔通風
楊秀惠話啲戲服又厚又唔通風

敬佩張衛健嘅專業

秀惠又坦言特別是幕後工作人員及男演員相對更辛苦,皆因幕後人員每日都要拿着很重的器材兼要日灑雨淋,付出的汗水及努力絕不比演員少,另外男演員的戲服比女演員更厚更密不透風:「好似張衛健要喺咁熱嘅天氣下着咁厚嘅戲服,仲要講好長嘅對白,佢啲對白可能一講就幾個鐘,但佢時刻都保持Energy,真係好敬佩佢嘅專業。」

楊秀惠同張衛健合作獲益良多
楊秀惠同張衛健合作獲益良多

疑似中暑

至於在烈日下拍攝,秀惠都出動全副「武裝」為消暑做好準備:「我會帶涼茶,食西瓜,劇組成日都會派綠豆沙畀大家飲,自己都會帶冰凍貼、風扇,我見有同事仲會帶一袋冰墊住坐,用嚟降溫。」她更大讚張衛健不時借出其座駕給藝人涼冷氣:「我今次飾演佢姨太太,喺佢身上唔單止學到演技,仲學識更多待人接物嘅事,無論天氣點熱環境點辛苦,佢都從來唔會發脾氣,對台前幕後每個人都非常有禮。」

楊秀惠同一班演員會食西瓜消暑
楊秀惠同一班演員會食西瓜消暑

秀惠雖然做足消暑準備,但連日來在日曬雨淋的環境下拍攝,都令她疑似中暑頭暈!她表示:「有一日拍到暈暈哋,我立即同助手講身體唔舒服,她立即沖寶礦力畀我補充水份消暑,又幫我搽白花油,等我集中精神。」她亦透露今次是她入行以來最長時間的一次出埠外景,所以帶備大量日用品,甚至牙膏、廁紙都準備齊全:「每日拍攝完返到酒店,真係完全冇精力再出去,所以我準備充足,務求將酒店房佈置到似自己屋企一樣,我仲帶咗自己公司嘅瘦身、護膚產品,自用之餘亦派畀其他藝人,大家有福同享。」

分享: