【潛水唔回應】《延禧攻略》傅恆戀情曝光? 許凱去白鹿屋企留宿!

圖︰白鹿(左一及三)最近被拍到畀許凱(左二)入屋留宿,大金(右一)就繼續以「前女友」鬧許凱同爆料。(微博圖片)

清宮劇《延禧攻略》熱播令劇中演員人氣急升,不過「人紅是非多」,劇中飾演傅恆嘅許凱就被捲入「家暴」同「偷食」疑雲!首先有內地網紅大金,自稱係許凱嘅前女友,仲話自己曾遭許凱「家暴」;又話許凱搭上好朋友嘅女友白鹿,涉嫌「偷食」。最近,許凱被拍得出入一名女子嘅寓所,而呢名女子,正正就係同佢因拍劇傳緋聞嘅白鹿喇!

大金憑一張床單 揭許凱私情?

大金自認許凱嘅前女友,仲話在白鹿於網上Po嘅一張相,認出相中床單係佢同許凱拍拖時買嘅!用呢個方法證明許凱嘅私情,又真係幾曲折喎!其實之前大金曾經話自己曾遭許凱「家暴」,許凱月前已出言否認指︰「我曾經是壞男生,所以更渴望有一天成長為一個好男人」、「我做錯的每件事兒,我都承認。有爭吵,有推搡,有撕扯,不是家暴」。但講到緋聞女友白鹿,許凱同佢嘅工作室都齊齊玩潛水,冇直接回應事件。

雖然冇明言,但許凱似乎想用行動證明,邊個先係真女友!風頭火勢,許凱都冇避嫌,仲要上埋白鹿屋企,唔知係咪想用呢個方法,將戀情曝光呢?

圖︰白鹿同許凱之前一齊拍古裝仙俠劇《招搖》,因合演男女主角而傳出緋聞。(網上截圖)
圖︰內地網紅大金,似乎對許凱有好多怨氣。(微博圖片)
圖︰許凱早於7月27日發文,澄清自己冇「家暴」人。(微博圖片)
分享: