【電競專訪】公民力量辦「手遊電競賽」 潘國山︰要認同佢哋係專業嘅!

圖︰潘國山表示,自從舉辦手游電競賽後,收到不少區內青少年的正面回應。(Elaine攝)

近年電競風氣席捲全球,更成為亞運表演項目;公民力量今日(9日)於沙角社區會堂舉行《王者榮耀手遊電競賽》,共13隊青年隊伍一同參與手游電競賽,並爭奪冠、亞、季、殿軍獎項。

公民力量主席、沙田區議員潘國山接受《流動新聞》專訪表示,希望透過活動提供平台予青少年發揮電競才能,「我哋願意提供平台,做一個服務;雖然我哋能夠幫到佢哋嘅未必好多,但第一係要認同佢哋係專業嘅;有啲家長會覺得(打電競)好壞,但其實未必嘅。」

以電競接觸區內青少年

潘國山指,自從舉辦手游電競賽後,收到不少區內青少年的正面回應,「唔少青少年都同我哋講,諗唔到你哋做地區工作、做區議員,都會關心我哋。」今次是公民力量第二次舉辦手游電競賽,活動更獲交通銀行股份有限公司香港分公司冠名贊助,勝出隊伍可獲得港幣500至2000元獎金,以作鼓勵。潘國山指,雖然獎金唔算多,但都是對參加者的支持。潘國山更指︰「我會在場為佢哋鼓掌、打氣、起哄,我覺得自己都後生啲!」

不少家長對於子女打機都不太支持,認為打機只是遊戲,對於電競沒有太多概念。潘國山指,這群青少年參加者,可透過參加比賽得到認同,「佢覺得我哋都畀個平台、畀個機會佢哋,展示自己嘅技能,同時我哋都接受佢哋、認同佢哋。因為有啲青少年嘅家長唔想佢哋打機,而我哋就覺得佢哋打機都係得嘅,都認同佢地嘅,其實而家亞運都有電競啦!」

圖︰潘國山指,這群青少年參加者,亦因為參加比賽而得到認同。(Elaine攝)

做好時間分配 以學業為先

電競並非只是打機、玩遊戲,隊員亦可透過電競,學習團隊合作與溝通;但對於學生參與電競活動,潘國山有這樣的建議,「要做好時間分配,學生一定係以學業為先,所以要將時間安排好,唔好一打機就打到天昏地暗、咩都唔理!」

而他們舉辦《王者榮耀手遊電競賽》,亦將參賽者年齡門檻設於18歲或以上。「上一次比賽,我哋守住18歲嘅底線,但有好多學生打電話嚟話我地知,電競唔一定18歲以下就唔玩得,今次我哋就嘗試畀一隊(16-18歲的隊伍)入嚟試一試。」而是次《王者榮耀手遊電競賽》之得獎隊伍為︰冠軍「我無敵你隨意」、亞軍「三五成群」及季軍「beehive」。【電競在香港】系列之一

圖︰公民力量今日(9日)於沙角社區會堂舉行《王者榮耀手游電競賽》,共13隊青年隊伍一同爭奪冠、亞、季、殿軍獎項。(Elaine攝)
分享: