【用支付寶買樓】肥媽大灣區置業獲減20萬 幫15個孫一人買一層

圖︰肥媽早前於大灣區置業,仲話業主減價20萬賣層樓畀佢,佢更即刻用支付工具畀錢買樓!(fb圖片)

Maria Cordero(肥媽)有一個夢想,當大家聽完之後,相信都會覺得佢啲孫真係好幸福!肥媽今日(25日)出席一個電子流動支付服務活動,佢話早前去咗大灣區拍節目,用支付寶買咗層樓,「賣家80萬嘅樓可以減到60萬,即刻買啦!仲用(支付服務)嚟俾咗80,000蚊現金。」肥媽話,層樓係送畀第一個孫,之後想每個孫一人送一層,佢總共有15個孫,現時香港樓價咁貴,都真係幾難實現。

自減身價接Job 「樓盤活動就送樓俾我啦!」

其實肥媽喺大灣區買嗰層樓,唔夠一個月都升咗5%,佢話自己早兩年已經有計劃喺大灣區置業,而退休後都打算同老公搬到內地居住︰「香港實在太貴,將自己現時嘅住宅租俾人4至5萬蚊,喺內地洗都洗唔晒,自己冇理由做到80歲都要做,要諗自己安居樂業。」

而肥媽就話,為咗要達成每個孫一人送一層樓嘅置業夢,近排仲自減身價接job,「我唔只一層樓,仲孭住15個孫,呢一層樓係送俾第一個孫,打後一有錢就會買樓,希望每個孫都有一層樓,越快越好!所以呢排減價平啲接工作,樓盤活動就送樓俾我啦!最緊要賺多啲,買到樓。」

分享: