【整容後…】迪子韓國跌倒險毀容 做3手術「怕阿媽唔認得」

圖︰歌手迪子去年10月在首爾跌倒,面臨毀容;迪子日前承認今年3月在韓國接受自體脂肪移植面部輪廓塑形、自體軟骨鼻塑形和削顴骨「整容」手術。圖右為整容前,圖左為整容後。(fb圖片)

歌手迪子2017年10月於首爾意外跌倒,因「面撼鐵櫈」險被毀容,幸得韓國整容醫院免費幫佢重修牙齒,迪子日前更於網上承認整容;原來佢於今年3月已經喺韓國接受3項整容手術,包括:自體脂肪移植面部輪廓塑形、自體軟骨鼻塑形,同埋削顴骨。

「我都唔想太唔同樣!」

迪子接受傳媒訪問時表示,自己於今年3月13日在韓國接受上述3項整容手術,「預計要一年後先可以完全消腫,其實比我想像中冇咁痛,只係頭幾個禮拜傷口等消腫時好辛苦。」她又表示,「我都唔想太唔同樣,驚阿媽唔認得我,所以只係微調。」

佢又笑言自己「整容失敗」︰「睇電視或網上見到,啲人都整到好似混血兒,我都有講笑話,點解我整完唔似混血兒?係咪失敗咗!」

新歌MV今晚首播

樂天的迪子更將呢件事寫成新歌《美哉》,「呢件事畀我深刻體會,在以貌取人嘅商業社會好難生存,所以我有感而發寫咗呢首歌,唔想畀自己活喺悲傷裏面,不如化悲痛為力量,自己嘅人生,自己才是導演。」

在新歌MV中,迪子會將自己由意外、毁容、整容手術、康復期間嘅過程公開。對於片中會有「腫到豬頭」嘅樣貌示人,迪子自言唔怕影響形象,「我都冇形象可言,可能做創作嘅人較勇啦!」而呢個MV將於今晚(3日)晚上10點在其youtube channel發佈。

圖︰在新歌MV中,迪子會將自己由意外、毁容、整容手術、康復期間嘅過程公開。(網上圖片)
分享: