張錦程爆老婆憂個女性取向 張延曾年半拍十五劇

張錦程、張延一家三口。(微博圖)

52歲嘅張錦程日前作客ViuTV節目《晚吹-Daddy Kingdom》一集擔任嘉賓。講到同張延嘅婚姻家庭,張錦程就大爆老婆喺個女3歲嗰時就有問佢,「驚唔驚個女第日係女同性戀」 嘅問題!張錦程表示成日都同佢講,個女長大後會有自己嘅世界。講到張錦程索老婆張延,選美出身嘅佢曾受無綫力捧,曾由94至95年呢年半左右拍咗15部無綫劇,當年同張錦程呢個配搭仲被戲稱為「美女與野獸」。二人於2004年結婚,張延翌年就生咗個女,並因此息影一年多,囡囡「張小小」如今都快將13歲。

張錦程、張延。(微博圖)

訪問中,張錦程大爆老婆張延喺女兒3歲嗰時,已經問佢驚唔驚女兒同性戀。張錦程話佢成日都同老婆講,個女長大後,會有自己嘅世界:「呢啲係生理影響,取向冇人知。每人有每人想法,每人有每人喜好,總之唔傷害別人咪算囉!」張錦程亦表示如果女兒有原則性犯錯,佢一定會鬧:「例如佢(囡囡)主動欺負人,遲到呀咁。」

張錦程、張延一家同徐克合影。(微博圖)

張延曾係選美冠軍

張延劇照。(微博圖)

入行多年嘅張錦程,參與拍過無數電影、電視劇演出,佢同同樣係演員嘅張延,1996年喺上海拍《繞著神州走》節目時相識,2001年二人重逢撻著,張錦程做埋張延經理人。而前無綫女星張延係選美出身,報讀華南理工之前,曾參加第二屆廣州「美在花城」選美大賽,仲拎埋冠軍。張延第一部無綫劇係1994年嘅《CATWALK俏佳人》,早前大台重播嘅《刑事偵緝檔案》第一輯,其中一個單元講「蝴蝶復仇」,「藍恩美」一角就係由張延飾演。

張延喺《刑事偵緝檔案》飾演「藍恩美」。(網絡圖片)
張延喺《刑事偵緝檔案》飾演「藍恩美」。(網絡圖片)
張錦程、張延近照。(微博圖)
分享: