【刑偵2】陶大宇細妹小柔近照曝光 星運欠佳變瑜伽導師

黃悅喺《刑事偵緝檔案2》中飾演張大勇同父異母細妹張小柔,如今變瑜伽導師嘅佢蒼老唔少。(網絡圖片)

大台重播嘅《刑事偵緝檔案2》中唔少陌生面孔勾起觀眾回憶,好似91年新秀李家強,喺其中一個單元飾演紅星張國強助手,男扮女裝發生斷背情,仲同飾演高敏嘅陳美琪爭仔,最後更被發現原來係命案兇手。除咗李家強之外,飾演張大勇同父異母細妹張小柔嘅女仔,唔少人都覺得熟口熟面。而呢位飾演小柔嘅演員真名叫黃悅。早年,黃悅因一口流利嘅英語,喺明珠台主持青少年節目,之後再被調去主持《閃電傳真機》,做咗半年,表現出色又有觀眾緣,被派演劇集《刑偵2》飾演陶大宇同父異母嘅妹妹。只可惜,黃悅嘅星途明顯比同期嘅李綺虹、鍾麗緹、鍾麗淇等遜色,好快已淡出香港返美發展,現為瑜伽導師。

「張小柔」黃悅近照。(網絡圖片)

劇中,小柔好鍾意唱歌,仲特登輟學、瞞住父親(劉丹)返香港參加歌唱比賽。雖然最後failed,但就近水樓台做咗陳美琪助手,仲係張國強被殺案嘅重要證人。

關於黃悅嘅資料認真唔多,連佢嘅年齡都係一個謎。據悉,黃悅加國出生長大,母親有四分之一華人血統。大學畢業後,黃悅放棄人工唔錯嘅全職工作,隻身來港發展加入無綫。

分享: