【係愛啊!】家人排第一位 黃長興堅持同家人攬攬錫錫

黃長興一家

藝人黃長興向來愛錫妻兒,暖男形象深入民心,雖然最近為拍攝新劇忙得不可開交,但他總會把握僅有的時間樂敍天倫,即使接拍廣告,長興都選擇全家上陣,實行寓工作於親子,順道將溫馨的畫面展現人前!

黃長興成家一齊拍廣告

長興早前帶同愛妻Peggy及一對寶貝Paige、Tristan到影樓拍攝廣告,他與愛妻換上西裝及晚裝,配合一對仔女的小王子及小公主造型登場,在全白氛圍的映襯下,彰顯紳士一面,兩夫妻期間不時錫錫小朋友,幸福滿載。四人之後以輕裝上陣在「LOVE」大字間大擺甫士,肥肥的Tristan肚仔凸凸,十分搶鏡!一家人藉工作相聚了整個下午,順利拍攝完畢後,Tristan即時跌watt扭眼瞓,長興把愛兒一抱入懷,強壯的臂彎默默展現出暖男本色。

黃長興一手將仔仔抱入懷,展現出暖男本色

抱抱錫錫舉動係充滿愛

感性的長興坦言十分愛惜家人:「家人永遠佔據我心中嘅第一位,即使幾忙只要一有空閒時間,我都願意花精神陪佢哋四圍玩玩,尤其係孩子大得好快,真係唔想錯過佢哋成長嘅每一刻。」在法國長大的長興更自爆堅持要與家人攬攬錫錫:「呢個做法對於中國人嚟講可能唔太習慣,但我喺外國長大,發覺呢個睇嚟微不足道嘅抱抱同錫錫,其實係充滿愛,所以我堅持每日出門都要同屋企人錫錫。除咗妻兒,我對爸爸媽媽兄弟姊妹都會咁做!大家都不妨試試,總好過因為『愛得太遲』而留憾!」

黃長興堅持要同家人攬攬錫錫
好Sweet啊
黃長興將家人擺喺第一位
分享: