同老公結婚18周年 程瑤爆草蜢係「媒人」

程瑤同老公結婚18周年

「仁美清叙」主席程瑤近年積極慈善工作,加上與老公的製作公司成立30周年,工作特別忙碌,不過日前她與老公結婚18周年,亦決定放假與老公及兩名兒子一起食飯慶祝。

預告歐遊劏老公

程瑤表示因近日與張敬軒合作,故去了對方新開的法國餐廳慶祝,她表示︰「其實結婚都咁多年,所以都唔使一定要二人世界,同埋埋兩個仔一齊慶祝都好開心!」問到老公有沒有準備大禮?她表示:「因為佢太忙,又驚太急買咗我唔鍾意,所以佢請我4月尾去歐洲旅行嗰陣畀我任買,我好期待,佢實大出血!」

程瑤同老公選擇同兩個囝囝一齊慶祝

提到近期與不少藝人合作做活動,平均一星期有幾個活動,程瑤直言最愛與草蜢合作,更憶起當年做模特兒時的事,笑言草蜢是她與老公的「媒人」:「同草蜢合作好有趣,可以諗返起自己做模特兒嘅時代,因為以前流行請模特兒拍卡拉OK嘅MV,而我拍得最多就係拍草蜢嘅歌,甚至試過同老公一齊拍,不過當時我哋仲未拍拖。」

程瑤指草蜢係佢同佢老公嘅「媒人」

此外程瑤透露歐洲旅行後會再到俄羅斯工作,更可寓工作於娛樂:「今年2018世界杯喺莫斯科舉行,我哋趁呢個難得嘅機會,策劃一個喺莫斯科舉行嘅大型活動,接待香港同國內嘉賓參加,一齊感受世界杯熱潮!」

分享: