黃牛問題嚴重!黃子華嬲爆:有關部門係咪要去正視吓?

黃子華(網上圖片)

黃子華即將舉辦的棟篤笑於昨日(26號)作優先訂票,豈料大批網民表示買唔到飛,連公民黨前主席梁家傑也在其社交網大呻,相反「黃牛網站」已經有門票出售,更炒至15,000元以上!

諗過報警

子華對於炒賣深感憤怒,昨日於社交網上載兩段影片,講到自己及團隊都沒有飛,但「黃牛」卻因「內部渠道」有飛,對此他坦言:「我覺得係咪要報警或者報畀ICAC聽呢?內部竟然有飛,係點樣得嚟?個問題係我地冇任何證據、線索去舉報,同埋最大問題係根據現有法例,(黃牛)唔係完全犯法,所以先會每個演唱會都有同一個問題。我喺度正式同政府提出,大家係咪係時候正視?好多時我同人講,呢啲係奢侈品,但係依家到民間每一次受歡迎嘅演唱會都係咁,普通民娛活動每一次都受到剝削時,有關部門係咪要去正視吓?」

被質疑「又食又拎」

另外有網民反問子華是否「又食又拎」,即一方面正式賣飛,另一方面賣黃牛飛,對此他直言很委屈,起初看到評論都十分激動要冷靜下來:「我冇咁嘅本事,事實上我可以話你聽我比任何人都覺得嬲,每一個表演者花咗咁多精神時間去準備,每日臨瞓之前我就諗緊嗰句嘢點講呢,未起身一擘大眼、半夢半醒又係諗緊嗰句嘢點講呢?我有句嘢諗咗成個月都唔知應該係點樣講,大家都好辛苦去準備一個表演,然後就係一啲完全唔需要去付出嘅人,去賣一倍、兩倍、三四五六七倍嘅價錢,然後一啲好長期支持你嘅fans要去承受呢啲價錢。我一路都好接受世界係唔完美,但係咁係太過不完美,係太過離譜!」

寧願個場吉

子華呼籲政府正視黃牛問題,又呼籲大家不要買黃牛飛,他直言:「即係如果我做騷有一堆位空,最前嗰啲空晒,如果我見到好多場都係咁,咁即係證明好多人可能冇買黃牛。可能咪做番一、兩場,補番畀呢啲觀眾囉!」同時他宣布下月將在城市電腦售票網公開發售門票,屆時每人只限4張,並透露原本有兩場用來休息或打風時「賠畀大家」,但現在決定不休息:「當我想賺多啲錢又好點都好,總之搏命做,應該係有唔少嘅飛,希望盡量滿足觀眾。」

黃子華認為政府要正視黃牛問題(影片截圖)
黃子華對被質疑「又食又拎」感到委屈(影片截圖)
分享: